Umra mavsumi tarixdagi rekord ko‘rsatkich
Umra kirish vizalari endi berilgan sanadan boshlab uch oy emas, bir oy amal qiladi.
Saudiya Arabistoni Haj va Umra vazirligi Umra vizalarining amal qilish muddatini uch oydan bir oyga qisqartirdi. Biroq, mamlakatga kirgach, tashrif buyuruvchi uch oygacha qolishi mumkin.
Yangi qoidalar joriy yil noyabr boshidan kuchga kirdi. Bu o‘zgarish joriy yilda umra vizasini olish soni rekord darajaga chiqqani bilan bog‘liq bo‘lib, hozirgacha to‘rt milliondan ortiq xorijiy ziyoratchiga viza berilgan.
Yangi tizimga ko‘ra, ziyoratchi viza berilganidan so‘ng 30 kun ichida Saudiya Arabistoniga kirmasa, uning vizasi avtomatik ravishda bekor qilinadi.
Shu bilan birga, mamlakatga kirgandan keyingi uch oylik yashash muddati saqlanib qoladi.
Umra va ziyorat bo‘yicha Milliy qo‘mita maslahatchisi Axmad Bajayeyferning ta’kidicha, o‘zgarishlar yoz mavsumi tugagach Makka hamda Madinada havo salqinlashidan so‘ng ziyoratchilar sonining keskin ko‘payishiga tayyorgarlik sifatida kiritilgan.
Joriy yilning iyun oyida boshlangan Umra mavsumi tarixdagi eng yuqori ko‘rsatkichni qayd etdi, besh oy ichida to‘rt milliondan ortiq xorijiy ziyoratchi Saudiyaga kelgan. Bu esa avvalgi butun mavsumlar natijalaridan ham yuqori bo‘lib, Umra ziyoratiga bo‘lgan jahon miqyosidagi talabning ortib borayotganini ko‘rsatadi.
T.Azimov tayyorladi
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
