Saudiya Arabistonida xizmat safarida bo‘lib turgan O‘zbekiston delegatsiyasi tarkibida Prezident maslahatchisi o‘rinbosari Muzaffar Komilov, muftiy Shayx Nuriddin Xoliqnazar hazratlari, Din ishlari bo‘yicha qo‘mita raisi Sodiqjon Toshboyev, shuningdek, Haj va umra bo‘yicha attashe Shuhrat Amoniy kabi soha mas’ullari “Haj–2026” mavsumida hamyurtlarimiz istiqomat qilishi ko‘zda tutilgan mehmonxonalarni atroflicha o‘rganmoqdalar.
Sharoit va qulayliklar tahlil qilinmoqda
Mehmonxonalarni ko‘zdan kechirish jarayonida binolarning umumiy imkoniyatlari va ziyoratchilar uchun yaratilgan qulayliklar sinchiklab o‘rganildi. Jumladan:
– Foyelarning kengligi va harakatlanish qulayligi;
– Liftlar soni va kengligi;
– Xonalardagi sharoit, o‘rinlar soni va jihozlar holati;
– Oshxona sig‘imi, tibbiyot va ishchi guruhlari uchun ajratilgan xonalar — barchasiga alohida e’tibor qaratildi.
Har bir xona — ziyoratchi qulayligi uchun
O‘rganish chog‘ida har bir xonada yuklar joylashtirish va harakatlanish uchun yetarli joy mavjudligi, yuvinish xonalari, kiyim javonlari, yozuv stoli, televizor, sovutgich va muzlatgich, qibla ko‘rsatkichi, joynamoz va Qur’oni karim bilan ta’minlangani, shuningdek, sanitariya va gigiyena talablariga to‘liq rioya etilganiga e’tibor berildi.
Joylashuv qulayligi ham baholandi
Mehmonxonalarning Harami sharif, Mino, Arafot kabi haj arkonlari ado etiladigan muqaddas hududlarga yaqinligi hamda transport qatnovining qulayligi delegatsiya diqqat markazida bo‘ldi.
O‘rganish jarayonida mutasaddilar tomonidan Saudiya Arabistoni Haj va umra vazirligining hamkorlik talablarini inobatga olgan holda, ushbu tartib-qoidalarga alohida e’tibor qaratish ta’kidlab o‘tildi.
“Haj – 2026” mavsumida o‘zbekistonlik ziyoratchilarning huzurlanib, xotirjam ibodat etishlari uchun amalga oshirilayotgan tayyorgarlik ishlari — Yangi O‘zbekistonda “Inson qadri — oliy qadriyat” tamoyili hayotga izchil tatbiq etilayotganining yorqin ifodasidir.
O‘zbekiston musulmonlari idorasi Matbuot xizmati
Yangi tayinlangan imomlar uchun seminar bo‘lib o‘tdi
#xabar #seminar #imom #malaka
O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbuslari bilan diniy soha xodimlarining kasbiy salohiyatini oshirish, faoliyat samaradorligini yuksaltirish va qat’iy tartib-intizomni ta’minlash maqsadida tizimli chora-tadbirlar amalga oshirilmoqda.
Shu maqsadda joriy yilning 29–30 sentyabr kunlari Diniy idoraning Masjidlar bilan ishlash hamda Kadrlar bo‘limlari hamkorligida respublikamiz bo‘yicha yangi lavozimga tayinlangan 59 nafar imom-xatib va imom noiblari uchun ikki kunlik maxsus o‘quv-seminari tashkil etildi.
Mashg‘ulotlar davomida O‘zbekiston musulmonlari idorasi raisi o‘rinbosari Zayniddin domla Eshonqulov, Kadrlar bo‘limi boshlig‘i Salohiddin Sharipov, Masjidlar bilan ishlash bo‘limi mudiri Muzaffar Kamolov, Ichki nazorat bo‘limi xodimi Umidjon Xodjayev hamda Fatvo markazi bosh mutaxassisi Hikmatulloh domla o‘z yo‘nalishlari bo‘yicha dolzarb ma’ruzalar bilan ishtirok etdilar.
Ikki kunlik o‘quv davomida soha mutasaddilari tomonidan kundalik xizmat jarayonida zarur bo‘ladigan muhim tavsiyalar, mehnat munosabatlari, ichki tartib va odob-axloq qoidalariga qat’iy rioya etish masalalari tushuntirildi. Shuningdek, imom-xatiblar faoliyati samaradorligini baholash (KPI) tizimini to‘g‘ri yuritish va uning tartibotlari, shar’iy masalalarda fatvo berish mas’uliyati hamda fatvo berish huquqiga doir muhim yo‘nalishlar bo‘yicha zarur amaliy ko‘nikma va nasihatlar berildi.
O‘zbekiston musulmonlari idorasi
Matbuot xizmati
