YUNISЕF delegatsiyasi bilan uchrashuv o‘tkazildi
Shu yil 6 noyabr kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov YUNISЕFning Yevropa va Markaziy Osiyo mintaqaviy ofisi mintaqaviy maslahatchisi Luka Solimeo va tashkilotning O‘zbekistondagi vakolatxonasi vakillaridan iborat delegatsiyani qabul qildi.
Dastlab Homidjon domla mehmonlarni tashrif bilan qutlar ekan, Muftiy Shayx Nuriddin Xoliqnazar hazratlari safarda ekanligini ma’lum qilib, ularning samimiy salomlarini yetkazdi. Shuningdek, yurtimizda diniy-ma’rifiy sohada amalga oshirilayotgan yangilanishlar, diyorimizda 130 dan ziyod millat va elat vakillari tinch-totuv va hamjihatlikda yashab kelayotgani haqida so‘zlab, Diniy idora faoliyat yo‘nalishlari haqida atroflicha ma’lumot berdi.
O‘z navbatida Luka Solimeo janoblari samimiy qabul va kerakli ma’lumotlar uchun minnatdorlik bildirdi. Shuningdek, u o‘z so‘zi davomida xalqaro tashkilot faoliyatida Diniy idoralar bilan hamkorlik alohida o‘rni borligi, ayniqsa, ijtimoiy munosabatlar va fatvo masalasi ahamiyatli ekani ta’kidladi.
Luka Solimeo YUNISЕF faoliyati haqida ma’lumot berar ekan, tashkilot xalqaro loyihalarni amalga oshirishda har bir davlatga alohida yondashishi, mahalliy aholi tarixi, kelib chiqishi, qiziqishlariga qaragan holda xalqaro tajribalarni moslashtirishi, bunda o‘rganish bilan amaliy ishlarni baravar olib borishi kabi jihatlar haqida so‘z yuritdi.
Uchrashuv davomida tashkilotning O‘zbekistondagi vakolatxonasi va Diniy idora mas’ul vakillari o‘z fikr-mulohazalarini bayon etib, o‘zaro hamkorlik aloqalari 2018 yildagi uch tomonlama memarandum asosida olib borilayotgani, 2021-2025 yillarda ushbu yo‘nalishdagi aloqalar yuqori darajaga ko‘tarilgani, ayni paytda kelgusi 4 yillik rejalari ishlab chiqilayotgani haqida ma’lumot berishdi.
Mazkur uchrashuv Diniy idora va xalqaro tashkilotlar hamkorligining yangi, samarali bosqichi sari qo‘yilgan muhim qadam bo‘ldi.
O‘zbekiston musulmonlari idorasi
Matbuot xizmati
“Uthaym” gazetasi: Madaniy merosni asrash Yangi O‘zbekiston taraqqiyotining muhim yo‘nalishiga aylangan
Shri-Lankaning “Uthaym” nashrida O‘zbekistonning boy tarixiy-madaniy merosi, uni asrab-avaylash va kelajak avlodlarga bezavol yetkazish borasida amalga oshirilayotgan ishlarga bag‘ishlangan maqola e’lon qilindi, deb xabar bermoqda “Dunyo” AA.
Materialda Yangi O‘zbekistonda milliy qadriyatlarni tiklash, madaniy meros obyektlarini muhofaza qilish, ilm-fan va ma’rifatni rivojlantirishga qaratilgan islohotlar yuksak baholangan.
Ta’kidlanganidek, so‘nggi yillarda O‘zbekistonda ma’naviy-ma’rifiy sohani tubdan takomillashtirish, xalqning ko‘p asrlik boy ilmiy-madaniy merosini o‘rganish hamda uni jahon hamjamiyatiga keng targ‘ib etish davlat siyosatining ustuvor yo‘nalishlaridan biriga aylandi.
Mamlakatda tarixiy obidalarni restavratsiya qilish, muzeylar va arxivlar faoliyatini modernizatsiya qilish, qo‘lyozmalarni asrab-avaylash va raqamlashtirish, milliy madaniy merosni xalqaro miqyosda targ‘ib qilishga qaratilgan tizimli ishlar amalga oshirilayotgani qayd etilgan.
Maqolada Prezident Shavkat Mirziyoyev tashabbusi bilan ilgari surilgan Uchinchi Renessans g‘oyasi mamlakat taraqqiyotining muhim strategik yo‘nalishi sifatida alohida e’tirof etilgan. Muallif fikricha, mazkur g‘oya nafaqat tarixiy merosni asrab-avaylash, balki ilm-fan, ta’lim, madaniyat va innovatsiyalarni uyg‘un rivojlantirish orqali mamlakatning intellektual va ma’naviy salohiyatini yuksaltirishga xizmat qilmoqda.
Uchinchi Renessans konsepsiyasi O‘zbekistonning buyuk ilmiy an’analarini qayta tiklash, yosh avlodni bilimli va vatanparvar etib tarbiyalash hamda mamlakatning xalqaro nufuzini yanada mustahkamlashga qaratilgan umummilliy dastur sifatida baholanmoqda.
Gazetaning yozishicha, O‘zbekistonda kechayotgan o‘zgarishlar faqat madaniy sohadagi islohotlar bilan cheklanmaydi. Ular mamlakatning ilmiy, ma’naviy va intellektual taraqqiyotini ta’minlashga qaratilgan uzoq muddatli strategiyaning ajralmas qismi hisoblanadi. Ilmiy muassasalar faoliyatini qo‘llab-quvvatlash, tarixiy manbalarni tadqiq etish, madaniy merosni muhofaza qilish va zamonaviy ta’lim tizimini rivojlantirish kabi yo‘nalishlar yagona maqsad — Yangi O‘zbekistonning mustahkam ma’naviy poydevorini yaratishga xizmat qilayotgani alohida qayd etilgan.
Maqolada Toshkent shahrida barpo etilgan O‘zbekiston Islom sivilizatsiyasi markazi faoliyatiga keng o‘rin ajratilgan.
Prezident Shavkat Mirziyoyev tashabbusi va g‘oyasi asosida barpo etilgan mazkur betakror majmua O‘zbekistonning madaniy va ilmiy siyosatidagi eng muhim istiqbolli loyihalardan biri bo‘ldi. Markazda VII asrga oid noyob Usmon Mus'hafi saqlanayotgani uning tarixiy ahamiyatini yanada oshiradi.
Shu bilan birga, bu yerda qo‘lyozmalarni ilmiy o‘rganish, restavratsiya qilish, arxiv materiallarini tizimlashtirish va zamonaviy texnologiyalar asosida raqamlashtirish uchun barcha zarur sharoitlar yaratilgan.
Gazetada O‘zbekistonning YUNЕSKO va boshqa xalqaro tashkilotlar bilan madaniy merosni muhofaza qilish sohasidagi hamkorligi, tarixiy obidalarni asrab-avaylash, ularni xalqaro turizm va ilmiy tadqiqotlar bilan uyg‘un rivojlantirishga qaratilgan sa’y-harakatlari haqida so‘z yuritilgan.
O‘zbekiston musulmonlari idorasi Matbuot xizmati
- «
- »