Har bir inson sehrgar, folbinning huzuriga borishdan saqlanishi lozim. Afsuski, ayol-qizlar orasida taqdir va qismatning achchiq sinovlaridan umidsizlikka tushib, sehrgarlarning oldiga boradiganlari ko‘p uchraydi. Ular turli bahonalar bilan sehrgarga murojaat qiladilar.

Sehrgarlar esa, hissiyotga beriluvchi ayollardan unumli foydalanadilar. Ayollarning pulini “shilib” olish maqsadida huzurlariga qayta-qayta kelishlari lozimligini alohida ta’kidlashadi. Aks holda, og‘ir musibat yoki kasallikka uchrashlari haqida qo‘rqitadilar.

Imom Qurtubiy rahimahulloh aytadilar: “Odamlar orasida sehrgarlar oldiga ko‘p qatnovchilar ayollardir. Ayniqsa, ular hayz holatida bo‘lganlarida sehrning ta’siri yanada kuchayadi. Bejiz hadisi shariflarda “do‘zax ahlining ko‘pchiligi ayollardir” deyilmagan”.

Ibn Umar roziyallohu anhudan rivoyat qilinadi. Nabiy sollallohu alayhi vasallam: “Ey ayollar jamoasi, sadaqa qilinglar, istig‘forni ko‘proq aytinglar. Albatta, men sizning do‘zax ahlining ko‘pi ekaningizni ko‘rdim”, deganlar.

Ayollar Allohga taqvo qiling! Chunki Allohdan qo‘rqish – haqiqiy baxtning kaliti. Alloh taolo bunday marhamat qiladi: “Kim Allohga taqvo qilsa, uning yo‘lini ochib qo‘yadir. Va unga o‘zi o‘ylamagan tarafdan rizq berur” (Taloq surasi, 2-3-oyatlar).

Alloh taoloning yozgan taqdiriga rozi bo‘ling. Zero, Alloh bandalariga faqat yaxshilikni ravo ko‘ruvchidir. Arzimas sabablarga diningizni sotmang. Sehrgar, folbinlarning yolg‘on va’dalariga ishonmang. Agar biror istak, orzu-niyatingiz bo‘lsa, Alloh taologa ixlos va ishonch bilan duo qiling. Zero, yolg‘iz Alloh foyda keltiruvchi va zararni qaytaruvchi Zotdir.

Alloh taolo bunday marhamat qiladi: “Agar Alloh seni zarar ila tutsa, Undan o‘zga o‘shanga kushoyish beruvchi yo‘qdir. Agar U senga yaxshilikni iroda qilsa, Uning fazlini rad qiluvchi ham yo‘qdir” (Yunus surasi, 107-oyat).

Davron NURMUHAMMAD