1. Allohdan shayton yomonligidan panoh so‘rash.

Sulaymon ibn Surad roziyallohu anhu aytadi: «Rasululloh sollallohu alayhi vasallam bilan birga o‘tirgan edim, ikki kishi so‘kisha ketdi. Ulardan birining yuzi qizarib, bo‘ynidagi ko‘k tomirlari bo‘rtib chiqdi. Shunda Rasululloh sollallohu alayhi vasallam: “Men bir kalimani bilaman, agar o‘shani aytsa, undan bu holat ketadi. Agar u “A’uzu billahi minash shaytonir rojiym” desa, undan mana bu holat ketadi”, dedilar» (Imom Buxoriy, Imom Muslim rivoyati).

2. Ushbu duoni o‘qish.

Oisha roziyallohu anho onamizdan rivoyat qilinadi: «Rasululloh sollallohu alayhi vasallam huzurimga kirdilar. Jahlim chiqib turgan edi. “Ey Uvaysh (Oisha ismining qisqartmasi)

“Allohummag‘firliy zanbiy va azhib g‘oyza qalbiy va ajirniy minash shaytoni”

“Allohim, gunohlarimni kechirib, qalbim g‘azabini ketkaz va shaytondan saqlagin” deb ayt” dedilar» (Imom Ibn Sunniy rivoyati).

3. Tahorat olish.

Atiyya ibn Urva Sa’diy roziyallohu anhudan rivoyat qilinadi. Rasululloh sollallohu alayhi vasallam: “Albatta g‘azab shaytondandir. Shayton o‘tdan xalq qilingan. Ut esa suv bilan o‘chiriladi. Agar sizlardan biringiz g‘azablansa, tahorat qilsin”, dedilar (Imom Abu Dovud rivoyati).

Davron NURMUHAMMAD