Shu yilning 24–28 noyabr kunlari O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi delegatsiya Iordaniya Hoshimiylar Podshohligida diniy-ma’rifiy sohadagi hamkorlikni rivojlantirish bo‘yicha xizmat safarida bo‘ladi.
O‘zbekiston delegatsiyasi Iordaniya bosh muftiysi va Fatvo markazi rahbari Ahmad Hasanot hazratlari, Vaqf, islom ishlari va muqaddas qadamjolar vaziri Muhammad Xaloyala janoblari, Podshoh Abdulloh II nomidagi Imomlar tayyorlash va malakasini oshirish instituti rahbari doktor Abdusattor Qudo, Iordaniya xalqaro islom ilmlari universiteti rahbariyati va bir qator sohaga daxldor mutasaddilar bilan ikki tomonlama muzokaralar o‘tkazishi rejalashtirilgan.
Safar davomida quyidagi vazifalar amalga oshiriladi:
- memorandumlar va qo‘shma dasturlarda belgilangan vazifalarni amaliyotga joriy etish;
- Iordaniya Fatvo markazi va O‘zbekiston musulmonlari idorasi Fatvo markazi o‘rtasida hamkorlikni yo‘lga qo‘yish va shar’iy masalalarga javoblar tayyorlash yuzasidan muloqotlar qilish;
- Podshoh Abdulloh II nomidagi Imomlar tayyorlash va malakasini oshirish markazi va shu kabi kasb-mahoratni oshirish kurslarida diniy soha xodimlari sonini oshirish;
- iordaniyalik olimlar asarlarini o‘zbek tiliga tarjima qilish;
- ilmiy markazlar, ta’lim muassasalari bilan aloqalarni yo‘lga qo‘yish, ustoz va talabalar almashinuvini muhokama qilish;
- Iordaniyaning vaqf mulkchiligi, masjidlarni boshqarish, qadamjolarni saqlash tajribasini o‘rganish va o‘zaro ziyorat turizmini rivojlantirish;
- boshqa sohaga daxldor mutasaddi idoralar bilan hamkorlik masalalarini yo‘lga qo‘yish.
O‘zbekiston musulmonlari idorasi Matbuot xizmati
“Sayeh”: O‘zbekiston – buyuk tarix va zamonaviy turizm uyg‘unlashgan maskan
Saudiyaning “Sayeh” sayyohlik portalida O‘zbekistonning noyob tarixiy-madaniy merosi va zamonaviy turizm infratuzilmasining jadal rivojlanishini yorituvchi maqolalar e’lon qilindi, deb xabar bermoqda “Dunyo” AA muxbiri.
Maqolada “Samarqand – madaniyatlar chorrahasi” nomi ostida YUNЕSKOning Butunjahon merosi ro‘yxatiga kiritilgan Buyuk Ipak yo‘li durdonasiga alohida e’tibor qaratilgan.
Registon maydoni ansambli, Go‘ri Amir maqbarasi, Ulug‘bek rasadxonasi, Bibixonim masjidi va Shohi Zinda majmuasiga alohida to‘xtalib o‘tilgan. Noyob qadimiy me’morchilik va moviy sirlangan mozaikalar jahon ilm-fani, siyosati va san’ati taraqqiyoti xotirasini o‘zida saqlab qolgani ta’kidlangan.
Shu bilan birga, mehmonxonalar tizimi, transport logistikasi va xizmat ko‘rsatish sohasining jadal rivojlanishi sayyohlarga yanada keng qulayliklar yaratayotgani qayd etilgan.
“O‘zbekistondagi ajoyib sayyohlik taassurotlari” sarlavhali maqolada mamlakat bo‘ylab turistlarga berilayotgan e’tibor xususida so‘z yuritilgan.
O‘zbekiston mehmonlariga Samarqandga tashrif, Buxoro va uning Poyi Kalon ansambli, Ark qal’asi, Xivadagi ochiq osmon ostidagi Ichan qal’a muzeyiga sayohatlar uyushtirish tavsiya etilgan. Poytaxt Toshkent marshrutni megapolis ritmi va metropoliten arxitekturasi bilan boyitsa, Zomin va Tyan-Shan tog‘li hududlari ekoturizm uchun keng imkoniyatlar ochadi.
O‘zbekiston yo‘nalishining asosiy jozibadorligi buyuk o‘tmish va zamonaviy shaharlarning kundalik hayoti uyg‘unlashganidadir. Yuqori darajadagi mehmondo‘stlik, palov tayyorlash an’analariga ega o‘ziga xos milliy oshxona, sharqona bozorlar shukuhi va rivojlanayotgan hunarmandchilik ustaxonalari sayohatga chinakam mahalliy ruh bag‘ishlaydi.
Infratuzilmaning tizimli modernizatsiya qilinishi, joylashtirish imkoniyatlarining kengayishi va qulay transport aloqalari O‘zbekistonni tarixni o‘rganish, madaniyatni his qilish va tabiat qo‘ynida dam olishni uyg‘unlashtirishni istagan xalqaro sayyohlar uchun ideal maskanga aylantirmoqda.
O‘zbekiston musulmonlari idorasi Matbuot xizmati