3 dekabr – Xalqaro nogironlar kuni munosabati bilan Buxoro viloyatidagi masjidlarda faoliyat yuritayotgan imom-xatiblar tomonidan jismoniy imkoniyati cheklangan fuqarolar holidan xabar olindi. Tashriflar davomida ularning muammo va ehtiyojlari o‘rganilib, ahvolidan xabar olish, ma’naviy ko‘mak ko‘rsatish hamda e’tibor-ehtimom bildirish maqsadida bir qator xayrli tadbirlar amalga oshirildi.
Islom dini inson qadrini barcha narsadan ustun qo‘yadi. Qur’oni karim oyatlari va muborak hadislarda jismoniy imkoniyati cheklangan shaxslarga mehr-shafqat ko‘rsatish, ularga madad berish va har tomonlama qo‘llab-quvvatlashga oid ko‘plab o‘git va tavsiyalar bayon etilgan. Mazkur xayrli tashabbuslar ham ana shu oliy insoniy va islomiy qadriyatlarning amaliy ifodasi hisoblanadi.
O‘zbekiston musulmonlari idorasi
Buxoro viloyati vakilligi Matbuot xizmati
Shu yil 13–14 mart kunlari yurtimizda "Obod va fayzli mahalla — yurt ko‘rki" shiori ostida muborak Ramazon hayitini munosib kutib olish, mahallalar va muqaddas qadamjolarni obodonlashtirish maqsadida o‘tkazilgan umumxalq xariya hashari diniy soha xodimlari va mo‘min-musulmonlarimizni ezgulik yo‘lida yanada jipslashtirdi.
Mazkur xayrli tadbirda O‘zbekiston musulmonlari idorasi tasarrufidagi qariyb 2150 ta masjid, 270 ta ziyoratgoh va 4500 ta qabriston hududlarida keng ko‘lamli tozalik ishlari uyushqoqlik bilan tashkil etildi. Hashar doirasida million kvadrat metrdan ortiq maydon chiqindilardan tozalanib, 35 000 tup ko‘chat ekildi hamda 88 000 dona daraxt oqlanib, shakl berildi.
Bayram oldidan nafaqat masjid va ziyoratgohlar, balki insonlar qalbiga ham quvonch ulashildi: imom-xatiblar boshchiligidagi 85 mingdan ziyod hasharchilar tomonidan 750 dan ortiq kam ta’minlangan oilalarning uy-joylari ta’mirlab berildi.
Shuningdek, 4100 nafardan ziyod ehtiyojmand oilalar, nogiron va yolg‘iz qariyalar holidan xabar olinib, ularga jami 1 mlrd 465 mln so‘m miqdorida moddiy yordamlar ko‘rsatildi. Bunday olijanob ishlar xalqimiz orasida mehr-oqibat va hamjihatlik rishtalarini yanada mustahkamlab, Ramazon hayiti shukuhini xonadonlarga olib kirdi.
Masjidlarda namozxonlar va ziyoratchilar uchun barcha qulay shart-sharoitlar hozirlanib, xonaqoh va tahoratxonalar bayram namoziga shay holga keltirildi.
O‘zbekiston musulmonlari idorasi
Matbuot xizmati