Bugun, 8 dekabr kuni Makka shahridagi “Marmara” mehmonxonasida Bosh qomusimiz O‘zbekiston Respublikasi Konstitutsiyasining 33 yilligi munosabati bilan ayni kunlarda Makkai mukarramada toatu ibodatlar bilan bo‘lib turgan 240 nafardan ziyod ziyoratchilarimiz uchun bayram tadbiri tashkil etildi.
Unda Jidda shahridagi bosh konsul Sirojiddin Shamsuddinov, “Haj” va “Umra” bo‘yicha attashe Shuhrat Amoniy, O‘zbekiston musulmonlari idorasi hamda Din ishlari bo‘yicha qo‘mitasi Ishchi guruh vakillari ishtirok etdi.
Mutasaddi vakillarimiz umra safarida bo‘lib turgan hamyurtlarimizni qomusimiz qabul qilingan kun bilan muborakbod etib, yurtimizda so‘nggi yillarda bo‘y ko‘rsatayotgan keng ko‘lamli islohotlar, erkinlik ne’mati, uni asrab-avaylash va qadrlash barcha yurt farzandlarining burchi ekanini alohida ta’kidlab o‘tishdi.
Ma’naviy-ma’rifiy uchrashuvda keyingi yillarda barcha sohalar qatori diniy-ma’rifiy sohada ham ulkan o‘zgarishlar ro‘y bergani, jumladan, umra ziyorati bir necha yuz ming nafarga, Haj kvotasi esa 15 ming nafargacha oshirilgani, ularga xizmat ko‘rsatish, mavjud sharoitlar havas qiladigan darajaga ko‘tarilgani, bunga hozirda umra amalini ado etayotgan hamyurtlarimiz bevosita guvoh bo‘layotgani qayd etildi.
Tadbirda ishtirokchilarni yaxshi tilak va duolar bilan qutlash barobarida bayram shirinliklari ham ulashildi. Ko‘taringki va samimiy ruhda o‘tgan tadbir ziyoratchilarda katta taassurot qoldirdi.
Alloh taolo yurtimizni tinch va farovon, xalqimizni xotirjam va baxtiyor aylasin!
O‘zbekiston musulmonlari idorasi Matbuot xizmati
HAYO – INSONNING ENG GO‘ZAL ZIYNATI
Bugun, 2 oktyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Toshkent viloyati Bo‘stonliq tumanidagi "Mushki anbar" jome masjidida juma namozini mo‘min-musulmonlar bilan birga ado etdilar.
Jamoat namozidan avvalgi mav’izada islomning eng go‘zal xulqi bo‘lmish hayo va iffat, ma’naviy poklik hamda bugungi kunning dolzarb ijtimoiy masalalari haqida ta’sirli suhbat qilindi.
Muftiy hazratlari Payg‘ambarimiz alayhissalomning: “Hayo imondandir, imonning joyi esa jannatdir. Behayolik esa jafodandir, jafoning joyi do‘zaxdadir”, degan muborak hadislarini keltirib, jannatdan umidvor har bir mo‘min hayoni o‘ziga shior qilishi lozimligini ta’kidladilar. Hayo – insonni yomonlik va gunohlardan to‘sib turuvchi eng go‘zal ziynatdir.
Suhbat davomida internetdagi behayoliklar va gunoh ishlarni oddiy hazil sifatida talqin qilishning og‘ir oqibatlari tushuntirildi. Qur’oni karimdagi: “Albatta, imon keltirgan kishilar orasida buzuqliklar tarqalishini xush ko‘radigan kimsalar uchun dunyoda ham, oxiratda ham alamli azob bordir” ("Nur" surasi, 19-oyat), degan qat’iy ogohlantirish eslatilib, bunday illatlar yoshlar qalbini ko‘r qilib, oilalar yemirilishiga sabab bo‘layotgani aytildi.
Shuningdek, jamiyatdagi zararli illatlar va ularning muolajasi haqida ham so‘z yuritildi.
Yakunda yurtimiz tinchligi va xalqimiz farovonligini so‘rab xayrli duolar qilindi.
O‘zbekiston musulmonlari idorasi Matbuot xizmati