Bugun, 11 dekabr kuni O‘zbekiston musulmonlari idorasida kasb-mahoratini oshirgan masjidlar muazzinlariga ijozat shahodatnomasi topshirish marosimi bo‘lib o‘tdi. Tadbirda taniqli ulamolar, tajribali imom-xatiblar, diniy ta’lim muassasalari ustoz-talabalari, malakali muazzinlar va mehnat faxriylari ishtirok etdi.
Tadbir Qur’oni karim qiroati va xayrli duolar bilan boshlandi.
Marosimda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari so‘zlab, keyingi yillarda mamlakatimizning barcha jabhalarida bo‘lgani kabi diniy-ma’rifiy sohada ham ko‘lamli islohotlar bo‘layotgani, Davlat Rahbari tomonidan sohaga qaratilayotgan alohida e’tibor natijasida bugungi yuksalishlarga erishilayotgani haqida aytib o‘tdilar. Xususan, Diniy idora tomonidan yurtimiz masjidlarida yangrayotgan azon ohanglari yanada go‘zal bo‘lishi uchun sa’y-harakatlar olib borilayotganiga urg‘u berdilar.
So‘zga chiqqan Qur’on va tajvidni o‘rgatish bo‘limi boshlig‘i Shayx Alijon qori Fayzulloh Maxdum o‘g‘li Muftiy hazratlari tashabbusi bilan imom-xatiblar qiroatini yaxshilash va muazzinlarning azon aytishlarini chiroyli qilish bo‘yicha xayrli ishlar yo‘lga qo‘yilgani, bu borada mo‘tabar manbalar va zamonaviy usullar asosida o‘quv rejalari ishlab chiqilgani, qariyb besh yil davomida Qoraqalpog‘iston Respublikasi, viloyatlar hamda Toshkent shahrida ikki mingdan ziyod muazzin uchun azon va iqoma bo‘yicha o‘quv seminarlar, onlayn va oflayn mashg‘ulotlar olib borilgani, mazkur amaliy mashg‘ulotlar davomida baholash mezonlariga ko‘ra saralab olingan 196 nafar muazzin maxsus o‘qitilgani, bugun ularning 70 nafardan ziyodiga ijozat shahodatnomalari berilayotgani haqida to‘xtaldi.
Tadbir davomida ishtirokchilarga muazzinlarning malaka oshirish darslari jarayonlaridan videolavha namoyish etildi. Shuningdek, malakali muazzinlarning azon sadolari tinglandi.
Shundan so‘ng azon va iqoma aytish bo‘yicha ijozat shahodatnomalarini topshirish marosimi bo‘lib o‘tdi. Unda Muftiy hazratlari va Shayx Alijon qori tomonidan malaka oshirgan bir guruh muazzinlarga ijozat shahodatnomalari va kitoblar to‘plami topshirildi.
Shuningdek, Muftiy hazratlari tomonidan o‘quv mashg‘ulotlarini tashkil etish va o‘tkazishda jonbozlik ko‘rsatgan Shayx Alijon qori boshchiligidagi ustozlarga tashakkurnomalar berildi.
O‘zbekiston musulmonlari idorasi
Matbuot xizmati
Praga shahrida O‘zbekistonning Chexiyadagi elchixonasi tashabbusi bilan qator ma’naviy-ma’rifiy uchrashuvlar va iftorlik tadbirlari tashkil etilmoqda. Minglab vatandoshlarimizni qamrab olayotgan xayrli tadbirlar “Ramazon – mehr-muruvvat va hamjihatlik oyi” g‘oyasi asosida o‘tkazilib, xorijdagi yurtdoshlarimizni birlashtirmoqda.
Pragadagi O‘zbekiston talabalari assotsiatsiyasida o‘tkazilgan uchrashuvda yuzdan ortiq vatandoshimiz ishtirok etdi. Suhbat davomida O‘zbekistondan borgan imomlar yoshlarning ta’limga mas’uliyat bilan yondashishi, qonunlarga rioya qilishi, shuningdek, o‘qish jarayoniga salbiy ta’sir ko‘rsatishi mumkin bo‘lgan omillardan ehtiyot bo‘lishi lozimligi haqida ma’ruzalar qilishdi. Shu bilan birga, Chexiya migratsiya qonunchiligi talablariga amal qilish masalalariga alohida urg‘u berildi.
“Turkiston” madaniy markazida ham vatandoshlar bilan muloqot tashkil etildi. Unda yuzlab ishtirokchilar qatnashib, Ramazon oyining mazmun-mohiyati, shaxsiy intizom va mas’uliyat, jamiyatda bag‘rikenglik muhitini mustahkamlash kabi masalalar xususida ma’ruza tinglandi.
Yurtimiz ulamolari, shuningdek, Tesla kompaniyasining Pragadagi qurilish obyektida mehnat qilayotgan vatandoshlar bilan ham uchrashdi.
“Sulaymon” turk madaniy markazida iftorlik dasturxoni yozildi. Iftorlikdan keyin taroveh namozi ado etildi. Dinning mo‘tadil va an’anaviy qadriyatlarini asrash, turli radikal g‘oyalardan ogoh bo‘lish mavzusida suhbat qilindi.
Har kuni davom etayotgan mazkur xayrli tashabbuslar chet elda tahsil olayotgan yoshlar va mehnat qilayotgan yurtdoshlar o‘rtasida o‘zaro hurmat va hamkorlik muhitini mustahkamlash, milliy va ma’naviy qadriyatlarni asrab-avaylashga targ‘ib etishi bilan ahamiyatlidir.
O‘zbekiston musulmonlari idorasi
Matbuot xizmati