O‘zbekiston musulmonlari idorasi tomonidan ko‘p yillar diniy-ma’rifiy sohada fidokorona xizmat qilgan taniqli ulamo Shayx Yusufxon to‘ra Shokirov tavalludining 100 yilligi mamlakatimiz bo‘ylab keng nishonlanmoqda.
Shu munosabat bilan «Xadichai Kubro» ayol-qizlar o‘rta maxsus islom ta’lim muassasasida ulamo xotirasiga bag‘ishlangan ma’naviy-ma’rifiy tadbirlar o‘tkazildi. Tadbir doirasida Yusufxon to‘ra hazratlarining yaqinlari va hamkasblari ishtirokida mazmunli davra suhbati tashkil etildi. Unda ulamoning qizlari — Rokiyaxon Hasanboyeva, Adibaxon Nishonova, Kifoyaxon Uzoqova, kelini Muazzamposhsha Shokirova hamda hamkasbi Zarifa Qosimova ishtirok etdilar.
Suhbat davomida talaba qizlarga Shayx hazratlarining Diniy boshqarmadagi ko‘p yillik samarali mehnati, ota sifatida farzandlariga ko‘rsatgan mehri, ayol-qizlarning ilm olishiga bo‘lgan yuksak e’tibori va zamon talablariga mos tarbiya berishdagi qat’iyati kabi fazilatlari haqida so‘zlab berildi.
«Shayx Yusufxon to‘ra Shokirov nafaqat yirik olim, balki qizlarining jamiyatda o‘z o‘rnini topishi va ilmli bo‘lishiga katta ahamiyat bergan fazilatli ota edilar», — deya ta’kidladilar.
Tadbirlar doirasida ustoz va talabalar tomonidan alohida tayyorgarlik ko‘rilib, eumladan, Shayx Yusufxon to‘ra Shokirov hayoti va faoliyatiga oid maxsus videorolik, infografikalar va taqdimot materiallari namoyish etildi.
Bu kabi tadbirlar kelajakda diniy va zamonaviy ilmlarni puxta egallashga intilayotgan talaba qizlar uchun yuksak ibrat va ma’naviy ozuqa bo‘lib xizmat qiladi.
Z. Komiljonova,
«Xadichai Kubro» ta’lim muassasasi ma’naviy-ma’rifiy ishlar
bo‘yicha direktor o‘rinbosari
Germaniyaning turli hududlarida istiqomat qilayotgan vatandoshlarimiz bilan ham qator ma’rifiy uchrashuvlar va muloqotlar tashkil etilmoqda.
O‘zbekiston Respublikasining Germaniya Federativ Respublikasidagi elchixonasida muborak vatandoshlarimiz uchun iftorlik tashkil etildi. Unga Germaniyada yashab, mehnat qilayotgan hamda tahsil olayotgan yurtdoshlarimiz taklif etildi.
Mazkur tadbirda Farg‘ona shahridagi “Xo‘jamberdiboy” jome masjidi imom-xatibi Husniddin domla Tursunzoda ishtirokchilar bilan “Vatanga muhabbat – eng muqaddas tuyg‘u” mavzusida ma’rifiy suhbat o‘tkazdi. Suhbat davomida Vatanga muhabbat va sadoqat, milliy va ma’naviy qadriyatlarimizni asrab-avaylash, chet elda yashab faoliyat olib borayotgan vatandoshlarimiz o‘rtasida birlik va hamjihatlikni mustahkamlashning ahamiyati haqida so‘z bordi.
Virjiniya, Nyu-York, Baltimor shaharlarida vatandoshlar, jamoat faollari va turli sohalar vakillari ishtirokida iftorlik dasturxonlari yozildi.
Uchrashuvlarda O‘zbekiston musulmonlari idorasi raisi o‘rinbosari Muhammadolim domla Muhammadsiddiqov boshchiligidagi ulamolarimiz Ramazon oyining fazilatlari, milliy o‘zlikni saqlash, O‘zbekistonda diniy-ma’rifiy sohada olib borilayotgan islohotlar haqida ma’ruzalar qilishmoqda.
Shuningdek, imom-xatiblarimiz u yerlarda taroveh namozlarini o‘qib berib, vatandoshlarimizni xushnud etmoqda. Ular do‘stlik, hamjihatlik va o‘zaro hurmat muhitida, bir dasturxon atrofida jam bo‘lib, Ramazon oyining ma’naviy qadriyatlari – bag‘rikenglik, saxovat va birlikni yana bir bor his qilishmoqda.
Yekaterinburg shahrida ham vatandoshlar uchun iftorlik uyushtirildi.
Unda Toshkent shahridagi “Baland” jome masjidi imom-xatibi A’zamjon Ergashev Islom dinining ma’naviy va insonparvarlik qadriyatlari haqida ma’ruza qilib berdi.
Uchrashuv davomida vatandoshlar o‘zlarini qiziqtirgan diniy va dunyoviy mazmundagi savollarga javob olishdi.
Mehmonlar uchun O‘zbekistonning turizm salohiyati va muqaddas qadamjolarini ochib beruvchi videoroliklar, milliy an’analar, madaniy meros va islom dinining jamiyat hayotidagi o‘rnini aks ettiruvchi tarqatma materiallar namoyish qilindi.
Dunyoning 50 ta shahrida o‘tkazilayotgan bunday xayrli tadbirlar vatandoshlarimizning ma’naviy birligini mustahkamlash, yurt bilan bog‘liqlik tuyg‘usini yanada kuchaytirish hamda milliy va diniy qadriyatlarimizni targ‘ib etishda muhim ahamiyat kasb etadi.
O‘zbekiston musulmonlari idorasi
Matbuot xizmati