Ilm yo‘lidagi yoshlarga e’tibor va e’tirof
Imom Buxoriy nomidagi Toshkent islom institutida Namangan viloyatidan kelib tahsil olayotgan talabalar uchun “Masofalarni yaqin qiluvchi muloqot” shiori ostida davra suhbati o‘tkazildi.
Tadbir O‘zbekiston musulmonlari idorasi Namangan viloyati vakilligi tashabbusi bilan tashkil etildi.Namangan viloyati bosh imom-xatibining birinchi o‘rinbosari Obidxon domla Ikromov 30 nafar talaba bilan yuzma-yuz suhbatlashib, odob-axloq, ustozga hurmat va ilm yo‘lida oliy himmatli bo‘lish haqida ma’naviy-hayotiy nasihatlar berdi.
Tadbir yakunida 30 nafar talabaga esdalik sovg‘alari topshirildi. Shuningdek, eng faol 4 nafar talabaga to‘lov-shartnomalarini qoplash uchun 10 million so‘mdan maxsus sertifikatlar taqdim etildi.
***
22-yanvar kuni «Ko‘kaldosh» o‘rta maxsus islom bilim yurtida Namangan viloyatidan kelib tahsil olayotgan talabalar uchun «Masofalarni yaqin qiluvchi muloqot» shiori ostida davra suhbati o‘tkazildi.
O‘MI Namangan viloyati bosh imom-xatibining o‘rinbosari Akmalxon domla Ahmedov 12 nafar talaba bilan ochiq muloqot o‘tkazib, ilm olishda to‘g‘ri niyat, islomiy odob-axloq va ustozlarga hurmat masalalariga e’tibor qaratdi.
Tadbir yakunida talabalarga esdalik sovg‘alari topshirildi.
Bu kabi uchrashuvlar yoshlar uchun moddiy-ma’naviy madad va yurt ravnaqi yo‘lida xizmat qilishga katta rag‘bat bo‘lib xizmat qiladi.
O‘zbekiston musulmonlari idorasi
Matbuot xizmati
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati