Shaxmat bo‘yicha final bahsi g‘olibi aniqlandi
#xabar #shaxmat #final
Xabar berganimizdek, “O‘zbekiston musulmonlari idorasi kubogi” sport musobaqalarining shaxmat turi bo‘yicha final bahslari yuqori saviyada, qizg‘in va murosasiz ruhda kechdi.
Musobaqa yakunlariga ko‘ra, g‘oliblar quyidagicha bo‘ldi:
1-o‘rin — Toshkent viloyati vakili Abdulazizxon domla Ahmadxo‘jayev.
2-o‘rin — Qoraqalpog‘iston Respublikasi vakili Abdulkabir domla Idrisov.
3-o‘rin — Farg‘ona viloyati vakili Niyozbek domla Payg‘amov.
Respublika bosqichi natijalariga binoan birinchi o‘rin sohibi I darajali diplom hamda zamonaviy noutbuk, ikkinchi o‘rin sohibiga II darajali diplom va smart televizor, uchinchi o‘rin g‘olibiga esa III darajali diplom hamda planshet topshirildi.
Alloh taolo g‘oliblarga mukofotlarni muborak aylasin!
O‘zbekiston musulmonlari idorasi
Matbuot xizmati
Aholi bilan ochiq muloqot: murojaatlar yechim topmoqda
O‘zbekiston musulmonlari idorasi tomonidan aholi bilan yo‘lga qo‘yilgan ochiq va samimiy muloqot tizimi fuqarolarning murojaatlarini atroflicha o‘rganish hamda ularga tezkor yechim topishda muhim omil bo‘lmoqda.
12 avgust kuni Diniy idora raisi o‘rinbosari Zayniddin domla Eshonqulov navbatdagi fuqarolar qabulini o‘tkazib, yurtdoshlarimizning arz, taklif va murojaatlarini tingladilar. Yuzma-yuz suhbat jarayonida masjidlar holati va faoliyati, imom-xatiblar ishi, Haj va Umra ziyoratlarini tashkil etish, oilaviy munosabatlarni tartibga solish hamda moddiy yordam ko‘rsatishga oid ko‘plab masalalar chuqur tahlil qilinib, ularning aksariyati joyida ijobiy hal etildi.
Eslatib o‘tamiz, bu kabi qabullar va fuqarolar bilan muloqot tadbirlari Diniy idoraning hududiy vakilliklari hamda yurtimizdagi barcha jome masjidlarda har haftaning chorshanba kuni imom-xatiblar tomonidan o‘tkazib kelinmoqda.
O‘zbekiston musulmonlari idorasi
Matbuot xizmati
