#xabar #musobaqa #final
Uzoq kutilgan final o‘yini bo‘lib o‘tdi. “O‘zbekiston musulmonlari idorasi kubogi” voleybol musobaqasi yakuniy uchrashuvida Qoraqalpog‘iston musulmonlari qoziyoti va Qashqadaryo vakilligi jamoalari o‘zaro bellashdi. Ikki jamoa ham ushbu musobaqaga jiddiy tayyorgarlik ko‘rib kelishgani yaqqol sezilib turdi.
Final o‘yinini taniqli futbol sharhlovchisi Mirzahakim To‘xtamirzayev sharhlab bordi.
Murosasiz kechgan o‘yinni sport shaydolari olqishlar ila kuzatib borishdi. Unda Qashqadaryo viloyati vakilligi jamoasi 2:0 hisobida ustun kelishdi. Shunday qilib, musobaqa yakuniga ko‘ra:
1-o‘rin: Qashqadaryo viloyati vakilligi jamoasi.
2-o‘rin: Qoraqalpog‘iston musulmonlari qoziyoti jamoasi.
3-o‘rin: Navoiy viloyati vakilligi jamoasiga nasib etdi.
Musobaqadan so‘ng taqdirlash marosimi bo‘lib o‘tdi. Unda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekiston Respublikasi Sport vaziri maslahatchisi Sharifjon Mo‘minjonov, O‘zbekiston voleybol federatsiyasi bosh kotibi Farhod Alimov, Din ishlari bo‘yicha qo‘mita boshqarma boshlig‘i Muhiddin Hakimov va bir qator mutasaddilar bosh kubokni final o‘yini g‘olibi Qashqadaryo viloyati jamoasiga tantanali tarzda topshirdilar.
Shuningdek, g‘olib jamoa a’zolarining har biriga birinchi o‘rin medali va noutbuk taqdim etildi.
Qoraqalpog‘iston jamoasiga esa ikkinchi o‘rin medali va zamonaviy televizor, Navoiy jamoasiga uchinchi o‘rin medali va planshet topshirildi.
Shuningdek, sportning voleybol va shaxmat turlari bo‘yicha o‘tkazilgan "O‘zbekiston musulmonlari idorasi kubogi" musobaqalarining eng yaxshi uyinchisi nominatsiyasi g‘olibi deb Namangan viloyati vakilligi jamoasi tarkibida o‘ynagan Muxtorjon domla Yunusov topildi. Unga diplom va umra yo‘llanmasi taqdim etildi.
Alloh taolo g‘olib jamoalarga mukofotlarni muborak aylasin, do‘stlik va hamjihatlikka xizmat qiluvchi bunday musobaqalar davomli bo‘lsin!
O‘zbekiston musulmonlari idorasi
Matbuot xizmati
“The Diplomatic Insight”: Mustaqil O‘zbekistonning yutuqlari xalqaro hamjamiyatning diqqat markazida bo‘lib kelmoqda
Pokistonning “The Diplomatic Insight” jurnali navbatdagi sonida O‘zbekiston hayotiga doir turkum maqolalar e’lon qilindi, deb xabar bermoqda “Dunyo” AA.
Xususan, jurnal sahifalaridan O‘zbekistonning zamonaviy taraqqiyoti, mamlakatimizning xalqaro nufuzi, tarixiy-madaniy merosini keng targ‘ib etish borasida amalga oshirilayotgan ishlarga bag‘ishlangan maqolalar o‘rin olgan.
Prezident Shavkat Mirziyoyevning O‘zbekiston mustaqilligining o‘ttiz besh yilligiga bag‘ishlangan tantanali marosimdagi nutqi va Yangi Toshkent shahrida o‘tkazilgan tantanali tadbirga bag‘ishlangan maqolalar jurnalning bosh sahifalaridan o‘rin olgan.
Materiallarda mamlakatimiz taraqqiyotining yangi bosqichi, poytaxtning zamonaviy qiyofasini shakllantirish, Yangi Toshkentni zamonaviy, innovatsion va inson uchun qulay shahar sifatida barpo etish borasidagi keng ko‘lamli ishlarga e’tibor qaratilgan.
Jurnalda 25–29 avgust kunlari Toshkent va Samarqand shaharlarida o‘tkazilgan “Islom sivilizatsiyasi markazi: yangi nigoh, yangi kashfiyotlar” mavzusidagi xalqaro mediaforumda ishtirok etgan “The Diplomatic Insight” bosh muharriri Asif Nur qalamiga mansub maqolalar ham yoritilgan.
Ularda islom sivilizatsiyasining jahon tarixi va madaniyatidagi o‘rni, uning ilmiy-ma’rifiy merosini o‘rganish va keng jamoatchilikka yetkazishda ommaviy axborot vositalarining roli haqida so‘z yuritiladi.
Ayniqsa, O‘zbekiston zaminida yetishib chiqqan buyuk allomalar va mutafakkirlarning ilmiy merosini xalqaro miqyosda targ‘ib qilish, madaniy-gumanitar hamkorlikni yanada rivojlantirish masalalariga urg‘u berilgan.
Mazkur materiallar O‘zbekistonning tarixiy-madaniy merosi va bugungi islohotlarini xalqaro auditoriyaga yetkazishda media diplomatiyasining ahamiyatini ko‘rsatib beradi. Xususan, islom sivilizatsiyasiga oid ilmiy va madaniy merosni xolis hamda zamonaviy axborot vositalari orqali yoritish xalqlar o‘rtasida o‘zaro anglashuv va hurmatni mustahkamlashga xizmat qilishi qayd etiladi.
O‘zbekiston musulmonlari idorasi Matbuot xizmati