Birinchi gul: Xushbo‘y gullari va mevali shoxlari bor xurmo daraxti kabi bo‘ling.
Ikkinchi gul: Insonlarning ayblarini oshkor qilish va ularni to‘plashga vaqtingiz bo‘lmasin.
Uchinchi gul: Agar Alloh siz bilan birga bo‘lsa kimdan qo‘rqasiz? Agar U zot sizga qarshi bo‘lsa kimdan umid qilasiz?
To‘rtinchi gul: Hasad inson tanasini yemiradi, rashkning ko‘payishi esa to‘xtatib bo‘lmas olov kabidir.
Beshinchi gul: Bugun tayyorlaning, zaxira yig‘ing. Chunki ertangi kun sizning mulkingiz emas.
Oltinchi gul: Janjal va bekorchiliklardan uzoqlashing.
Yettinchi gul: Xulqingiz ila chiroyli bog‘u bo‘stonlardan ham go‘zal bo‘ling.
Sakkizinchi gul: Yaxshilikni yoying, shunda siz u ila insonlarning eng baxtlisiga aylanasiz.
To‘qqizinchi gul: Insonlarni ularni yaratgan Zotga, hasadni o‘limga qoldiring va dushmanlaringizni unuting.
O‘ninchi gul: Harom ishlarning lazzatidan keyin nadomat, hasrat va azob kelishini unutmang.
Doktor Oiz al-Qarniyning
"Dunyodagi eng baxtli ayol" kitobidan
Bugun, 9 oktyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Shayxontohur tumanidagi "Koh ota" jome masjidida ado etdilar.
Muftiy hazratlari namozdan oldin jamoatga Islom dinida insonlarga manfaat yetkazish, jamiyat va elni obod qilishning ahamiyati hamda saxovat va xayr-ehsonning ma’naviy fazilatlari haqida ta’sirli suhbat qilib berdilar.
Ma’ruzada aytilganidek, insonga berilgan imkoniyatlar Alloh taoloning in’omi. Odamlarga ezgulik va manfaat yetkazish esa ulug‘ amallar sirasidan. Masalan, ta’lim maskanlari, shifoxona, yo‘l yoki ko‘priklarni ta’mirlab bergan kishiga shu joylardan qancha foydalanilsa, shuncha savob yoziladi.
Suhbat davomida bunga Abu Hurayra roziyallohu anhudan rivoyat qilingan muborak hadis keltirildi:
Rasululloh sollallohu alayhi va sallam: “Inson vafot etsa, uning amallari uziladi, faqat uchta narsadan: sadaqai joriyadan, foydalaniladigan ilmdan va uning haqiga duo qilib turadigan solih farzanddan tashqari”, deganlar (Imom Muslim rivoyati).
Muftiy hazratlari ushbu hadisga tayanib, jamiyatga foydasi tegadigan xayrli ishlarni qoldirish har bir mo‘min uchun abadiy savob manbai – sadaqai joriya bo‘lishini tahlil qilib berdilar.
Shuningdek, jamiyatda saxovat va oqibat muhitini mustahkamlash, yoshlarni ilm-ma’rifatli va vatanparvar etib tarbiyalash masalalariga ham to‘xtalib o‘tildi.
Yakunda yurtimiz tinchligi, xalqimiz farovonligi hamda el manfaati yo‘lida xizmat qilayotgan barcha fidoyi va saxovatpesha yurtdoshlarimiz haqiga xayrli duolar qilindi.
O‘zbekiston musulmonlari idorasi Matbuot xizmati