Chexiyada ham Ramazon tadbirlari davom etmoqda
Praga shahrida O‘zbekistonning Chexiyadagi elchixonasi tashabbusi bilan qator ma’naviy-ma’rifiy uchrashuvlar va iftorlik tadbirlari tashkil etilmoqda. Minglab vatandoshlarimizni qamrab olayotgan xayrli tadbirlar “Ramazon – mehr-muruvvat va hamjihatlik oyi” g‘oyasi asosida o‘tkazilib, xorijdagi yurtdoshlarimizni birlashtirmoqda.
Pragadagi O‘zbekiston talabalari assotsiatsiyasida o‘tkazilgan uchrashuvda yuzdan ortiq vatandoshimiz ishtirok etdi. Suhbat davomida O‘zbekistondan borgan imomlar yoshlarning ta’limga mas’uliyat bilan yondashishi, qonunlarga rioya qilishi, shuningdek, o‘qish jarayoniga salbiy ta’sir ko‘rsatishi mumkin bo‘lgan omillardan ehtiyot bo‘lishi lozimligi haqida ma’ruzalar qilishdi. Shu bilan birga, Chexiya migratsiya qonunchiligi talablariga amal qilish masalalariga alohida urg‘u berildi.
“Turkiston” madaniy markazida ham vatandoshlar bilan muloqot tashkil etildi. Unda yuzlab ishtirokchilar qatnashib, Ramazon oyining mazmun-mohiyati, shaxsiy intizom va mas’uliyat, jamiyatda bag‘rikenglik muhitini mustahkamlash kabi masalalar xususida ma’ruza tinglandi.
Yurtimiz ulamolari, shuningdek, Tesla kompaniyasining Pragadagi qurilish obyektida mehnat qilayotgan vatandoshlar bilan ham uchrashdi.
“Sulaymon” turk madaniy markazida iftorlik dasturxoni yozildi. Iftorlikdan keyin taroveh namozi ado etildi. Dinning mo‘tadil va an’anaviy qadriyatlarini asrash, turli radikal g‘oyalardan ogoh bo‘lish mavzusida suhbat qilindi.
Har kuni davom etayotgan mazkur xayrli tashabbuslar chet elda tahsil olayotgan yoshlar va mehnat qilayotgan yurtdoshlar o‘rtasida o‘zaro hurmat va hamkorlik muhitini mustahkamlash, milliy va ma’naviy qadriyatlarni asrab-avaylashga targ‘ib etishi bilan ahamiyatlidir.
O‘zbekiston musulmonlari idorasi
Matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
