Imom Buxoriy majmuasi: Ulamolar ehtiromi va ilk hayit namozi
Samarqand viloyatida joylashgan Imom Buxoriy majmuasi nafaqat O‘zbekiston, balki butun islom olamida ulug‘ ziyoratgoh hisoblanadi.
O‘zbekiston musulmonlari idorasi raisi o‘rinbosari Homidjon domla Ishmatbekov Imom Buxoriy majmuasining ahamiyatini alohida ta’kidlab, bu maskan islom ma’rifatini yoyish, yosh avlodni milliy va diniy qadriyatlar ruhida tarbiyalashda muhim rol o‘ynashi haqida bayon qilgan.
Yaqinda majmuada ilk hayit namozi ado etildi. Bu voqea musulmonlar uchun katta ahamiyatga ega bo‘ldi. Namozga minglab namozxonlar tashrif buyurishdi.
Ushbu ko‘rsatuvda Imom Buxoriy majmuasining ahamiyati va ulamolarimiz tomonidan e’tirof etilishi yoritilgan.
O‘zbekiston musulmonlari idorasi Matbuot xizmati
Siz eng boy odamsiz!
Insonning fe’li qiziq: biz ko‘pincha o‘zimizda yo‘q narsalar haqida qayg‘urib, qo‘limizdagi bebaho ne’matlarni odatdagi holdek qabul qilamiz. Vaholanki, biz oddiy deb bilgan qulayliklar, sog‘liq va boshqa imkoniyatlar sayyoramizning millionlab aholisi uchun eng katta orzu hisoblanadi.
Jumladan, bugungi tongni dunyo bo‘yicha 174 mingga yaqin inson qarshi ololmadi. Ayni damda 50 milliondan ortiq odam saraton kasalligi bilan kurashmoqda. 300 million inson ranglar jilosini ko‘rish baxtidan mahrum. 400 millionga yaqin kishi esa eshitish moslamalarisiz dunyo tovushlarini eshita olmaydi. 770 milliondan ortiq katta yoshdagi inson hanuzgacha o‘qish va yozishni bilmaydi. 2,5 milliarddan ziyod aholi global axborot va internet imkoniyatlaridan uzilgan holda yashamoqda. 6,5 milliard inson esa samolyotda umuman uchib ko‘rmagan...
Bu raqamlar shunchaki quruq ko‘rsatkichlar emas. Ular ortida millionlab insonlarning ana shunday ayanchli taqdiri yotibdi.
Agar siz hozir ushbu matnni o‘qiy olayotgan, atrofdagi ranglar va tovushlarni his qilayotgan, eng muhimi, yangi kunni sog‘-omon yashayotgan bo‘lsangiz, demak, siz sayyoradagi eng baxtli insonlardan birisiz. Shunday ekan, turmush tashvishlaridan nolishni to‘xtating. Yon-atrofga boqing: siz yashayotgan bugungi kunga kimlardir yetmadi. Demak, har bir xotirjam olingan nafas, har tinch otgan tong uchun Yaratganga hamdlar aytib, shukronalik kayfiyati bilan yashang. Chunki siz eng boy odamsiz!
Akbarshoh RASULOV