Tonggi va kechki duo
وَكَانَ النَّبِيُّ صَلَّى اللهُ عَلَيْهِ وَسَلَّمَ يُعَلِّمُ بَعْضَ بَنَاتِهِ فَيَقُولُ: قُولِي حِينَ تُصْبِحِينَ: سُبْحَانَ اللهِ وَبِحَمْدِهِ، لَا قُوَّةَ إِلَّا بِاللهِ، مَا شَاءَ اللهُ كَانَ وَمَا لَمْ يَشَأْ لَمْ يَكُنْ، أَعْلَمُ أَنَّ اللهَ عَلَى كُلِّ شَيْءٍ قَدِيرٌ، وَأَنَّ اللهَ قَدْ أَحَاطَ بِكُلِّ شَيْءٍ عِلْمًا، فَإِنَّهُ مَنْ قَالَهُنَّ حِينَ يُصْبِحُ حُفِظَ حَتَّى يُمْسِيَ، وَمَنْ قَالَهُنَّ حِينَ يُمْسِي حُفِظَ حَتَّى يُصْبِحَ.
Nabiy sollallohu alayhi vasallam ba’zi qizlariga «Tong ottirganingda "Subhanallohi va bihamdihi, laa quvvata illaa billahi, maa shaa Allohu kana va maa lam yasha’ lam yakun. A’lamu annalloha ’alaa kulli shay’in qodiyr. Va annalloha qod ahota bikulli shay’in ilman»ni aytgin", deb o‘rgatar edilar va: "Kim shularni subh kirganda aytsa, to kech kirguncha himoya qilinadi. Kim shularni kech kirganda aytsa, to subh kirguncha himoya qilinadi", der edilar».
Duoning ma’nosi: «Alloh pokdir. Hamd Ungadir. Quvvat faqatgina Allohdadir. Alloh xohlagan narsa bo‘ladir. U xohlamagan narsa bo‘lmaydir. Albatta, Alloh har bir narsaga qodirdir. Va albatta, Alloh har bir narsani ilmi ila ihota qilgandir».
Tong chog‘i va kech kirganda o‘qiladigan duolar sirasiga bu rivoyatda kelgan duo ham qo‘shib qo‘yilsa, yaxshi bo‘ladi.
"Hadis va hayot" kitobining 35-juzi
Qalblarga sokinlik bag‘ishlovchi muqaddas maskan (fotolavha)
#xabar #muftiy #peshin
Bugun, 1 avgust kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Farg‘ona viloyati Qo‘qon shahridagi "Masjidul Latif" jome masjidida peshin namozini ado etib, jamoatga manfaatli mav’iza qilib berdilar.
Muftiy hazratlari suhbat avvalida yurtimizdagi xayrli diniy islohotlar sabab 150 dan ortiq yangi masjidlar ochilgani, 500 ga yaqin tahoratxona zamonaviy ta’mirlanayotgani va barcha hududlarda Qur’on kurslari yo‘lga qo‘yilayotgani katta ne’mat ekanini ta’kidladilar. Hozirgi murakkab va tahlikali zamonda shukronalik hissi bilan yashab, ahil-inoqlik va musulmonlar ittifoqligini mustahkamlash o‘ta muhim ekaniga urg‘u qaratdilar.
Shayx hazratlari ma’ruzalarida masjid va mo‘min kishi o‘rtasidagi uzviy bog‘liqlikni ajoyib o‘xshatish bilan izohlab, mo‘min kishi masjidda o‘zini xuddi suvdagi baliqdek erkin va xotirjam his qilishini, chunki masjid qalblarga sokinlik ulashuvchi haqiqiy rohat maskani ekanini qayd etdilar.
Mazmunli suhbatda yoshlar ta’lim-tarbiyasiga ham alohida e’tibor qaratilib, Samarqanddagi Imom Buxoriy majmuasi va u yerda barpo etilayotgan muzey misolida buyuk allomalarimizga ko‘rsatilayotgan yuksak ehtirom tilga olindi. Yoshlarimiz Imom Buxoriy kabi ulug‘ ajdodlarimizning ilmga bo‘lgan fidoyiligi va vatanparvarlik fazilatlaridan doimo o‘rnak olishlari zarurligi aytib o‘tildi.
Fayzli suhbat yakunida Haq taolodan yurtimizga tinchlik-omonlik, xalqimizga farovonlik va farzandlarimiz kamoli uchun xayrli duolar qilindi.
O‘zbekiston musulmonlari idorasi
Matbuot xizmati
