Alloh taolo barchamizni jannat ahlidan qilsin
1. Jannatda yoshimiz 30 yoki 33 yosh bo‘ladi (Iso alayhissalom yoshi kabi) va biz qarimaymiz.
2. Jannatdagi bo‘yimiz 60 ziro’ bo‘ladi (Odam alayhissalom bo‘yi kabi. Bir ziro’ taxminan 64 sm).
3. Har juma kuni qiyofamiz yanada go‘zallashib boradi va bu go‘zallik cheksiz ravishda ortib boradi.
4. Jannat ahli Allohning roziligiga erishadi va Uning jamolini ko‘rish baxtiga muyassar bo‘ladi. Bu – jannatning eng ulug‘ ne’matlaridan biridir!
5. Jannat ahlining jismoniy sifatlaridan: ular “jarad” (ya’ni, yuz va tanalarida ortiqcha soch bo‘lmaydi), ko‘zlari esa surma surtilgandek go‘zal bo‘ladi.
6. Jannat ahli saroylarda taxtlarda yonboshlab o‘tiradi, ostida daryolar oqib turadi. Jannatda Firdavsdan boshlanuvchi ko‘plab daryo va buloqlar mavjud.
7. Jannatda inson istagan barcha narsalar – yegulik, ichimlik, hayvonlar, turli qushlar bor. Mo‘min kishi xohlaganicha lazzat oladi.
8. Ayollar esa yoqut va marjon kabi, go‘yoki yashirin durlardek go‘zal bo‘ladi. Ularga abadiy yoshlik va hech qachon ko‘rilmagan go‘zallik beriladi. Boshlarida tojlar, kiyimlari ipakdan bo‘ladi.
9. Jannatning binolari oltin va kumushdan, tuprog‘i esa mushk va za’farondan, toshlari esa dur va yoqutdan bo‘ladi.
Alloh barchamizni jannat ahlidan qilsin
Homidjon qori ISHMATBЕKOV
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
