Alloh sizga bergan ne’matlarni hisoblab ko‘ring
Robbimga ishonch ila duo etarman,
Ko‘p o‘tmay uning ijobatin ko‘rarman.
Ertalab uyg‘ongan vaqtingizda bir oz o‘ylab ko‘ring. Bugun tong otdi. Ushbu tong qanchadan-qancha faqirlar ustidan nur sochdi, siz esa ne’mat ichidasiz. Bu tong minglab hibsdagilar, qanchadan-qancha ochlar uzra nur sochmoqda, siz esa qorningiz to‘q va ozodlikdasiz. Qanchadan-qancha ayollar musibatga uchragan, yaqinlarini yo‘qotgan, siz esa salomat va baxtiyorsiz. Qancha ayollarning ko‘zida yosh, minglab onalarning qalbida azob va yana qancha go‘daklarning tomog‘ida alam qichqirig‘i bor. Siz esa tabassum bilan yashamoqdasiz. Shunday ekan, Allohning karami va lutfi uchun U zotga hamd ayting.
O‘zingiz bilan yolg‘iz qoling hamda sizda qancha mol-dunyo va ne’matlar borligini bir hisob-kitob qilib ko‘ring: Chiroy, mol-mulk, oila, uy, Vatan, nur, havo, taom, dori-darmon va hokazo... Shunday ekan, xursand bo‘ling va baxtni his eting!
Shu’la: O‘zingizdagi pullar evasizga faqirlar duosi va miskinlar muhabbatini sotib oling.
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati