O‘zbekiston musulmonlari idorasida fuqarolar bilan ochiq muloqotni mustahkamlash, aholini qiynayotgan muammolarga ijobiy yechim topish maqsadida navbatdagi qabul jarayoni o‘tkazildi.
Tadbir davomida Muftiy hazratlarining birinchi o‘rinbosari Homidjon domla Ishmatbekov yurtimizning turli hududlaridan kelgan fuqarolarni qabul qilib, ularning murojaatlarini tingladi.
Muloqotlar davomida asosiy e’tibor oilaviy munosabatlarni sog‘lomlashtirish, muhtojlarga ijtimoiy ko‘mak berish, haj masalasi va boshqa diniy-ma’rifiy mavzularga qaratildi.
Har bir murojaat alohida sinchkovlik bilan o‘rganilib, fuqarolarga shariat ahkomlari va amaldagi qonunchilik doirasida batafsil tushuntirishlar berildi. Ko‘plab masalalar ijobiy hal etilgan bo‘lsa, qo‘shimcha vaqt talab qiladigan murojaatlar tegishli bo‘lim mutaxassislariga yo‘naltirilib, ijrosi nazoratga olindi.
Bunday tizimli muloqotlar inson qadrini ulug‘lash va jamiyatda ijtimoiy adolatni qaror toptirish yo‘lidagi muhim qadam bo‘lib xizmat qilmoqda.
O‘zbekiston musulmonlari idorasi
Matbuot xizmati
Ma’lumki, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbusi bilan yurtimizdagi imom-xatiblar va imom noiblari uchun tajvid darslari yo‘lga qo‘yilgan.
Shu munosabat bilan joriy yil 6 aprelidan boshlab Buxoro, Xorazm va Toshkent viloyatlarida tajvid ilmi bo‘yicha navbatdagi amaliy mashg‘ulotlar boshlandi.
Mazkur dastur doirasida 2026 yil 16 aprel kuni Xorazm viloyatidagi "Faxriddin ar-Roziy" o‘rta maxsus islom ta’lim muassasasida viloyat imom-xatiblari va imom noiblari uchun ilmiy-amaliy seminar tashkil etildi.
Mazkur tadbirda O‘zbekiston musulmonlari idorasi Qur’on va tajvidni o‘rgatish bo‘limi boshlig‘i Shayx Alijon qori Fayzulloh Maxdum ishtirok etib, "Xorazm ulamolarining tajvid va qiroat ilmiga qo‘shgan hissasi" mavzusida ham ma’ruza qilib berdi.
O‘zbekiston musulmonlari idorasi
Matbuot xizmati