Turkiya safari: qator kelishuvlarga erishildi
O‘zbekiston delegatsiyasining Turkiya davlatiga amaliy safari doirasida bugun, 22 aprel kuni Turkiya islomiy tadqiqotlar markazi rahbariyati va mutasaddilari bilan uchrashuv bo‘lib o‘tdi.
Muloqotda bugungi kun uchun juda muhim bo‘lgan kitoblar nashri, ularning elektron variantlarini ijtimoiy tarmoqlarda keng tarqatish hamda sun’iy aql tizimlaridan foydalanishda yoshlar o‘zlarini qiziqtirgan savollariga javobni asl manbalarga asoslangan ma’lumotlardan olishlarini ta’minlash borasida muzokaralar olib borildi.
Shu bilan bir qatorda, “Vaqf” xayriya jamoat fondi faoliyati bo‘yicha alohida muzokaralar o‘tkazilib, fondga doir kitoblar va ma’lumotlar bilan tanishildi.
Turkiyalik olimlar o‘z mamlakatlarida vaqf faoliyatini tashkil etishda qadimiy Buxoro va Samarqand maktablari tajribasidan foydalanishganini, bu borada maxsus tadqiqotlar o‘tkazib, kitob nashr etishganini mamnuniyat bilan e’tirof etishdi. Uchrashuv so‘ngida markaz tomonidan nashr etilgan “Sahihul Buxoriy” asarining ming yil oldingi nusxasi hamda Buxoro vaqf ishlariga doir tarixiy kitoblar o‘zbekistonlik mehmonlarga taqdim etildi.
Shuningdek, O‘zbekiston musulmonlari idorasi, Xalqaro islomshunoslik akademiyasi va Toshkent davlat sharqshunoslik universiteti kutubxonalaridagi tarixiy manbalar va qo‘lyozmalar ustida birgalikda tadqiqotlar o‘tkazishga kelishib olindi.
Hamkorlikning navbatdagi bosqichi Islom tarixi, san’ati va madaniyatini tadqiq qilish markazi (IRCICA) bilan davom etdi. Uchrashuvda O‘zbekistondagi mavjud ilmiy-tadqiqot markazlari bilan aloqalarni mustahkamlash, olimlarning ijodiy merosini o‘zaro turk va o‘zbek tillariga tarjima qilish hamda ijtimoiy tarmoqlarga joylashtirish masalalari muhokama qilindi. Turkiyadagi diniy tizim faoliyati va talabalar tajriba almashuvi bo‘yicha ham kelishuvlarga erishildi.
Kunning ikkinchi yarmida o‘zbekistonlik talaba yoshlar bilan uchrashuv tashkil etildi. Unda yurtimizda amalga oshirilayotgan islohotlar, milliy qadriyatlarga ehtirom, vatanparvarlik va yot oqimlardan saqlanish kabi dolzarb mavzular yoritildi.
Talabalar ko‘rsatilayotgan e’tibor uchun Davlatimiz rahbari va tashkilotchilarga o‘z minnatdorliklarini bildirishdi.
O‘zbekiston musulmonlari idorasi
Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
