“Maqomoti Zamaxshariy” kitobining taqdimoti bo‘lib o‘tdi
#Kitob_taqdimoti
Bugun, 6 may kuni Imom Buxoriy nomidagi Toshkent islom institutida O‘zbekiston musulmonlari idorasi raisi birinchi o‘rinbosari Homidjon domla Ishmatbekov tomonidan tarjima qilingan Imom Abulqosim Mahmud ibn Umar Zamaxshariyning “Maqomoti Zamaxshariy” kitobi taqdimoti o‘tkazildi.
Ellikta maqomadan tashkil topgan “Maqomoti Zamaxshariy” asarida har bir mo‘min-musulmonda bo‘lishi talab etiladigan go‘zal odoblar va xislatlar haqida so‘z boradi. Qariyb ming yil o‘tganiga qaramay, haligacha bu kitob o‘z qadrini yo‘qotgan emas.
Tadbirni Imom Buxoriy nomidagi Toshkent islom instituti rektori Uyg‘un G‘afurov kirish so‘zi bilan ochib berdi. Ustozlar tomonidan “Maqomoti Zamaxshariy” kitobidagi maqomot tushunchasi, asarning ahamiyati hamda tarjimaning yutuqlari va afzallik jihatlari haqida ma’ruzalar qilindi. Shuningdek, kitobning ma’naviy ahamiyati, uning professor-o‘qituvchilar, talabalar va diniy soha xodimlari uchun muhim qo‘llanma ekanligi ta’kidlandi.
Taqdimotda, shuningdek, “Ko‘kaldosh” o‘rta maxsus islom bilim yurti o‘quv ishlari bo‘yicha mudir o‘rinbosari Nodir domla Jalolov, “Shamsuddinxon Boboxonov” nashriyot-matbaa ijodiy uyi direktori Sultonbek Imomnazarov hamda professor-o‘qituvchilar va talabalar ishtirok etdilar.
Taqdimot tadbiri xayrli duolar bilan o‘z nihoyasiga yetdi.
O‘zbekiston musulmonlari idorasi
Matbuot kotibi
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
