Hadislarni noto‘g‘ri talqin qilishning xatari muhokama qilindi
Imom Buxoriy nomidagi Toshkent islom institutida «May oyi – hadis ilmlari fan oyligi» doirasida «Hadislarni noto‘g‘ri talqin qilishning jamiyatga salbiy ta’siri» mavzusida davra suhbati tashkil etildi.
«Hadis va islom tarixi fanlari» kafedrasi tomonidan tashkil etilgan ushbu tadbirda Modul ta’lim tizimi 2-kurs talabalari ishtirok etdi.
Tadbirni kafedra katta o‘qituvchisi Bahodir domla A’zamov ochib berdi. Ilmiy-ma’rifiy suhbatda «Mirza G‘olib» jome masjidi imom-xatibi Is'hoqjon domla Begmatov ma’ruza qilib, hadislarni noto‘g‘ri tushunish va noxolis talqin qilish jamiyat barqarorligiga zarar yetkazishi haqida muhim ma’lumotlarni taqdim etdi.
Muloqot davomida hadislarni sharhlashda doimo asl manbalarga va mo‘tabar ulamolarning asarlariga murojaat qilish bugungi kunning dolzarb zarurati ekani alohida ta’kidlandi.
Uchrashuv yakunida talabalar mavzu doirasida o‘zlarini qiziqtirgan savollarga batafsil javob oldilar.
Oliymahad.uz
Xalqaro forum: Islomiy moliya va sukuk bozorlari diqqat markazida
Bugun, 16 iyun kuni poytaxtimizda start olgan «Investitsiyalar barqarorligi: yangi ufqlar, yangi hamkorliklar» mavzusidagi Beshinchi Toshkent xalqaro investitsiya forumi doirasida «Toshkent» zalida muhim panel sessiyasi bo‘lib o‘tdi.
«Islomiy moliya va sukuk bozorlari: Ko‘rfaz kapitalini rivojlanayotgan iqtisodiyotlarga yo‘naltirish» mavzusiga bag‘ishlangan ushbu sessiyada xalqaro va mahalliy ekspertlar, moliyaviy tashkilotlar va davlat sektori vakillari ishtirok etdi.
Bugungi kunda jahon islomiy moliya bozorining hajmi 3 trillion AQSH dollaridan oshib ulgurdi. Sessiya davomida islomiy moliyaning asosiy vositalari hisoblangan sukuk (islomiy obligatsiyalar), takaful (islomiy sug‘urta) va shariat tamoyillariga muvofiq bo‘lgan boshqa moliyaviy tuzilmalar rivojlanayotgan bozorlar, xususan, O‘zbekiston iqtisodiyoti va infratuzilma loyihalariga suveren kapitalni jalb qilishda qanday rol o‘ynashi mumkinligi atroflicha tahlil qilindi.
Islom taraqqiyot bankining O‘zbekistondagi vakili Xusan Xasanov moderatorlik qilgan davra suhbatida yangi moliyaviy mahsulotlar dizaynini yaratish, milliy qonunchilik va tartibga solish tizimini xalqaro shariat standartlari bilan uyg‘unlashtirish hamda yangi emissiyalarga institutsional investorlarning talabini shakllantirish masalalari muhokama qilindi.
Panel sessiyasida sohaning nufuzli ma’ruzachilari, jumladan, O‘zbekiston Respublikasi Markaziy banki raisi o‘rinbosari Sanjar Nosirov, "AD Wealth" boshqaruvchi sherigi Alisher Jumanov, "IMAN" bosh ijrochi direktori Rustam Raxmatov, Ruminiyaning sobiq tashqi ishlar vaziri Ramona Menesku hamda O‘zbekiston iqtisodiy rivojlanish jamg‘armasi vitse-prezidenti Salome Svanadze o‘z ma’ruzalari bilan ishtirok etishdi.
Ekspertlarning firicha, O‘zbekistonda islomiy moliya ekotizimining rivojlanishi Ko‘rfaz mamlakatlaridan yirik investitsiya oqimlarini jalb qilish va mamlakatda tadbirkorlik sohasini moliyalashtirishning muqobil manbalarini yaratishda yangi ufqlarni ochib beradi.
Forum doirasidagi muhokamalar va sho‘ba majlislari davom etmoqda.
O‘zbekiston musulmonlari idorasi
Matbuot xizmati
