Odinaxon Muhammad Sodiq va talaba-qizlar ishtirokida ilmiy suhbat
Imom Buxoriy nomidagi Toshkent islom institutida «May oyi – hadis ilmlari fan oyligi» munosabati bilan «Hadis va islom tarixi fanlari» kafedrasi tomonidan talaba-qizlar ishtirokida ma’rifiy uchrashuv tashkil etildi.
Tadbirga faxriy mehmon sifatida «Hilol-nashr» nashriyoti direktor o‘rinbosari, olima Odinaxon Muhammad Sodiq taklif etildi.
Odinaxon Muhammad Sodiq o‘z ma’ruzasida hozirda tadqiq qilayotgan «Sahih Buxoriy rivoyatida ayol roviylarning o‘rni» mavzusidagi ilmiy yangiliklar bilan o‘rtoqlashdi.
Suhbat davomida «Sahihul Buxoriy» asarining avlodlarga yetib kelishida nafaqat erkak muhaddislar, balki ayol roviylarning ham xizmati beqiyos ekani alohida ta’kidlandi. Mashhur ayol roviylar haqidagi ma’lumotlar va ilmiy dalillar taqdimot orqali talabalarga batafsil tushuntirildi.
Tadbir yakunida talabalar o‘zlarini qiziqtirgan savollarga javob oldilar. Mazmunli va ilmiy suhbat uchun Odinaxon Muhammad Sodiqqa institut ma’muriyati nomidan minnatdorchilik bildirilib, tashakkurnoma va esdalik sovg‘alari topshirildi.
Oliymahad.uz
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
