Malaka oshirayotgan imomlar uchun maxsus o‘quvlar tashkil etildi
Bugun, 8 may kuni Din ishlari bo‘yicha qo‘mita huzuridagi Diniy-ma’rifiy sohada malaka oshirish va qayta tayyorlash institutida tahsil olayotgan bosh imom va imom-xatiblar uchun O‘zbekistondagi Islom sivilizatsiyasi markazida maxsus o‘quv mashg‘ulotlari tashkil etildi.
Diniy-ma’rifiy sohada malaka oshirish va qayta tayyorlash instituti hamda O‘zbekistondagi Islom sivilizatsiyasi markazi hamkorligida o‘tkazilgan mazkur mashg‘ulotlar O‘zbekiston Respublikasi Prezidenti tomonidan Markazning ochilish marosimida belgilab berilgan ustuvor vazifalar ijrosini ta’minlashga qaratilgani bilan ham e’tiborlidir. Zero, Davlatimiz Rahbari o‘z nutqida: "Bu dargohda islom merosini chuqur o‘rganish, diniy xodimlar va imom-xatiblarning malakasini oshirish, xalqaro hamkorlikni rivojlantirish ishlarini tashkil etish, o‘ylaymanki, maqsadga muvofiqdir", — deya ta’kidlagan edi.
O‘quv jarayonlari O‘zbekiston musulmonlari idorasi raisining birinchi o‘rinbosari Homidjon domla Ishmatbekov, Din ishlari bo‘yicha qo‘mita raisining birinchi o‘rinbosari Davronbek Maqsudov, Imom Buxoriy nomidagi Toshkent islom instituti rektori Uyg‘un G‘afurov hamda boshqa professor-o‘qituvchilar tomonidan olib borildi.
Mashg‘ulotlar davomida tinglovchilar "Davlat va din munosabatlari", "Ijtimoiy tarmoqlar va ommaviy axborot vositalarida axloqiy me’yorlar", "Fiqh ilmining metodologik asoslari va zamonaviy yondashuvlar" kabi mavzular asosida o‘z bilim va malakalarini oshirdilar.
Mazkur o‘quvlar diniy-ma’rifiy sohada faoliyat olib borayotgan mutaxassislarning zamonaviy bilim va ko‘nikmalarini mustahkamlash, jamiyatda ma’rifat va bag‘rikenglik muhitini yanada rivojlantirishga xizmat qilmoqda.
O‘zbekiston musulmonlari idorasi
Matbuot xizmati
Iordaniyada O‘zbekiston mustaqilligi bayrami munosabati bilan tadbir o‘tkazildi
Iordaniya poytaxtida O‘zbekiston mustaqilligining 35 yilligi munosabati bilan bayram tadbiri bo‘lib o‘tdi, deb xabar bermoqda “Dunyo” AA.
Tadbir O‘zbekistonning Ar-Riyoddagi elchixonasi tomonidan mamlakatimizning Iordaniyadagi faxriy konsuli Lauy Abug‘azaliy ko‘magida tashkil etildi.
Bayram tantanasida diplomatik korpus, Iordaniyaning davlat va jamoat tashkilotlari vakillari, taniqli ishbilarmonlar, yetakchi ommaviy axborot vositalari hamda o‘zbek diasporasi vakillari ishtirok etdi.
Uchrashuvda mehmonlar O‘zbekistonning mustaqillik yillarida erishgan yutuqlari, Prezident Shavkat Mirziyoyev rahbarligida amalga oshirilayotgan keng ko‘lamli islohotlar va zamonaviy ijtimoiy-iqtisodiy o‘zgarishlar natijalari bilan tanishtirildi.
Xalqaro hamkorlikni kengaytirish va O‘zbekistonning sarmoyaviy imkoniyatlariga alohida e’tibor qaratildi. Shu bilan birga, mamlakatimizning investitsion salohiyati, turizmni rivojlantirish, boy tarixiy-madaniy merosi hamda Islom sivilizatsiyasi markazi faoliyatiga bag‘ishlangan videoroliklar namoyish etildi.
Ishtirokchilar O‘zbekiston va Iordaniya o‘rtasidagi sayyohlik va gumanitar aloqalarni yanada rivojlantirishga xizmat qiladigan turizm imkoniyatlari, qadimiy shaharlar va madaniy obidalar bilan tanishish imkoniga ega bo‘ldi.
Eslatib o‘tamiz, 2025 yil 2 iyun kuni O‘zbekistonning qarorgohi Ar-Riyod shahrida bo‘lgan Iordaniyadagi elchisi Nodirjon Turg‘unov Qirol Abdulla II ibn al-Husaynga ishonch yorliqlarini topshirgandi.
O‘zbekiston musulmonlari idorasi Matbuot xizmati
- «
- »