“Haj – 2026” ishchi guruhi rahbari – Din ishlari bo‘yicha qo‘mita raisi Sodiqjon Toshboyev, Muftiy Shayx Nuriddin Xoliqnazar, “Haj” va “Umra” ishlari bo‘yicha attashe Shuhrat Amoniy hamda mahalliy mutasaddilar Mino va Arafot vodiylarida yaratilgan sharoitlar bilan yaqindan tanishdilar.
Guvohi bo‘lindiki, ushbu muborak maskanlardagi ziyoratchilar uchun yaratilgan sharoitlar, qulayliklar va infratuzilmalar o‘tgan yillarga nisbatan bir necha baravar sifat jihatidan yangi bosqichga ko‘tarilgan.
O‘zbekiston tomonining talablariga ko‘ra, ziyoratchilar haj kunlarida ko‘p vaqt toat-ibodatda bo‘ladigan Mino vodiysidagi chodirlar to‘liq gipsokarton bilan o‘raldi, har biriga zamonaviy freonli konditsioner o‘rnatildi va yuklar uchun alohida tokchalar qilingan. Yangi chodirlar gilamlar, yumshoq o‘rinlar, yostiq-choyshablar, kommunal xizmatlar bilan ta’minlangan va ikki qavatli qo‘shimcha yuvinish xonalari ham qurilgan. Avvalgi chodirlar matosi va markazlashgan sovutish tizimi jazirama kunlarda yetarli haroratni saqlolmas edi.
Arafot hududidagi har bir chodir issiq o‘tkazmaydigan zamonaviy sendvich panellar bilan to‘liq o‘ralgan va yorug‘lik uchun oynalar o‘rnatilgan. Mazkurlarda to‘shak, yostiq-choyshablar va har bir hoji uchun soyabon, sanitariya-gigiyena vositalari jamlanmasi tayyorlab qo‘yilgan. Shuningdek, mazkur hududlarda uch mahal issiq ovqat tarqatish, muntazam choy va salqin ichimliklar bilan ta’minlash va tibbiy xizmat ko‘rsatish uchun ham barcha sharoitlar hozirlangan.
Joriy mavsumda chodirlar videokuzatuv kameralari bilan jihozlangan bo‘lib, zarur hollarda hojilarga tezkor xizmat ko‘rsatish, xavfsizlikni ta’minlash va begona shaxslarning xatti-harakatlarining oldini olishga xizmat qiladi.
Hojilar chodirlarda vaqtlarini g‘animat bilib ko‘proq toat-ibodatda bo‘lishlari uchun taniqli ulamolarning suhbatlari, mashhur qorilarning qiroatlarini yetkazish maqsadida mikrofon va ovoz kuchaytirgichlar bilan yetarli darajada ta’minlandi.
Ta’kidlash joizki, mo‘min-musulmonlarga yanada qulay shart-sharoit hozirlanib, bu yilgi haj mavsumi sifat, mazmun va xizmatlar jihatidan eng yuqori darajada bo‘lishiga harakat qilinmoqda.
O‘zbekiston musulmonlari idorasi
Matbuot xizmati
AQSHdagi o‘zbek jamiyati vakillari bilan uchrashuv o‘tkazildi
Shu yil 8 sentyabr kuni O‘zbekiston musulmonlari idorasida AQSHda faoliyat yuritayotgan "VATAN Global Alliance" tashkiloti rahbari Ozod Soliyev boshchiligidagi delegatsiya bilan samimiy uchrashuv bo‘lib o‘tdi.
Muloqotda O‘zbekiston musulmonlari idorasi raisining birinchi o‘rinbosari Homidjon domla Ishmatbekov, Din ishlari bo‘yicha qo‘mita raisining birinchi o‘rinbosari Davronbek Maxsudov hamda mutaxassislar ishtirok etdi.
Uchrashuv davomida AQSHdagi yurtdoshlarimizga doimiy ruhiy-ma’naviy ko‘mak berish va ularning ijtimoiy moslashuviga ko‘maklashish, xususan, yoshlar tarbiyasiga alohida e’tibor qaratib, xorijiy tillarda erkin ma’ruza qila oladigan malakali yosh kadrlarni tayyorlash yaxshi natija berishi qayd etildi.
O‘zbekiston musulmonlari idorasi
Matbuot xizmati
