Har kuningizni yangi hayotdek o‘tkazing
Bismillahir Rohmanir Rohiym
Agar intilsangiz orzu etib ulkan sharaf tomon,
Yulduzlardan past narsaga qanoat etmang hech qachon.
Banda Allohning tavfiqi va barakasidan mahrum bo‘lganda go‘zallik, zakovat, kuch-quvvat va ma’rifat in’omlarining barchasi musibatga aylanadi. Shuning uchun Alloh bandalarini ana shunday xafalik va sarosimalikdan ogoh etadi. Masalan, siz gohida yo‘lda ketayotgan bo‘lasiz, shunda siz tarafga qarab bir mashina yeldek uchib kelayotgan bo‘ladi. U ko‘zingizga badaningizni parchalab, hayotingizga nuqta qo‘yadigandek tuyuladi. Shunda bor kuchingiz bilan qutulishga va omon qolishga intilasiz. Alloh taolo bandalariga Undan yuz o‘girsalar ana shunday halokat va o‘limlarga duch kelishlarini bildirishni xohlaydi va najotni U zotdangina izlashlarini buyuradi:
﴿فَفِرُّوا إِلَى اللَّهِ إِنِّي لَكُمْ مِنْهُ نَذِيرٌ مُبِينٌ وَلَا تَجْعَلُوا مَعَ اللَّهِ إِلَهًا آَخَرَ إِنِّي لَكُمْ مِنْهُ نَذِيرٌ مُبِينٌ﴾
“Bas, faqat Allohgagina qoching. Albatta, men sizlarga Undan (kelgan) ochiq-oydin ogohlantiruvchiman.Va Allohga boshqa ma’budni sherik qilmanglar. Albatta, men sizlarga Undan (kelgan) ochiq-oydin ogohlantiruvchiman” (Zariyat surasi, 50-51-oyatlar).
Inson o‘zini tiklashi, hayotini qayta tartibga solishi va Robbisi bilan har kuni oldingisidan afzalroq aloqa bog‘lashi talab etiladi. Ushbu ma’noni bu duo to‘liq ifoda etadi: “Allohim, Sen Robbimsan, Sendan o‘zga iloh yo‘q. Sen meni yaratgansan, men Sening qulingman. Men imkon qadar Senga bergan va’dam va ahdimda sodiqman. Sendan qilgan narsalarim sababli yetadigan yomonlikdan panoh so‘rayman. Menga bergan ne’matlaringni e’tirof etaman, gunohlarimni ham e’tirof etaman. Meni kechir, Chunki gunohlarni faqat Sengina kechirguvchisan”.
Bu duoni har kuni tong otgan va kun botgan vaqtda qayta o‘qish va o‘z va’dasini qayta yangilab olish lozim.
Shu’la: Agar biror ishingizda muvaffaqiyatsizlikka uchrasangiz hech qachon umidsizlikka taslim bo‘lmang, tushkunlikka tushmang. Sizni shak-shubhalar chulg‘ab olishiga aslo yo‘l qo‘ymang!
Doktor Oiz al-Qarniyning
"Dunyodagi eng baxtli ayol" kitobidan
Siz eng boy odamsiz!
Insonning fe’li qiziq: biz ko‘pincha o‘zimizda yo‘q narsalar haqida qayg‘urib, qo‘limizdagi bebaho ne’matlarni odatdagi holdek qabul qilamiz. Vaholanki, biz oddiy deb bilgan qulayliklar, sog‘liq va boshqa imkoniyatlar sayyoramizning millionlab aholisi uchun eng katta orzu hisoblanadi.
Jumladan, bugungi tongni dunyo bo‘yicha 174 mingga yaqin inson qarshi ololmadi. Ayni damda 50 milliondan ortiq odam saraton kasalligi bilan kurashmoqda. 300 million inson ranglar jilosini ko‘rish baxtidan mahrum. 400 millionga yaqin kishi esa eshitish moslamalarisiz dunyo tovushlarini eshita olmaydi. 770 milliondan ortiq katta yoshdagi inson hanuzgacha o‘qish va yozishni bilmaydi. 2,5 milliarddan ziyod aholi global axborot va internet imkoniyatlaridan uzilgan holda yashamoqda. 6,5 milliard inson esa samolyotda umuman uchib ko‘rmagan...
Bu raqamlar shunchaki quruq ko‘rsatkichlar emas. Ular ortida millionlab insonlarning ana shunday ayanchli taqdiri yotibdi.
Agar siz hozir ushbu matnni o‘qiy olayotgan, atrofdagi ranglar va tovushlarni his qilayotgan, eng muhimi, yangi kunni sog‘-omon yashayotgan bo‘lsangiz, demak, siz sayyoradagi eng baxtli insonlardan birisiz. Shunday ekan, turmush tashvishlaridan nolishni to‘xtating. Yon-atrofga boqing: siz yashayotgan bugungi kunga kimlardir yetmadi. Demak, har bir xotirjam olingan nafas, har tinch otgan tong uchun Yaratganga hamdlar aytib, shukronalik kayfiyati bilan yashang. Chunki siz eng boy odamsiz!
Akbarshoh RASULOV
