Joriy yilning 20 may kuni O‘zbekiston musulmonlari idorasining Qashqadaryo viloyatidagi vakili, viloyat bosh imom-xatibi Rahmatillo domla Usmonov boshchiligida Yakkabog‘ tumani markazidagi "Jome" masjidida navbatdagi sayyor seminar o‘tkazildi. Unda viloyat hokimi o‘rinbosari Firdavs Sattorov, viloyat tarkibidagi shahar va tumanlarning bosh imom-xatiblari hamda Yakkabog‘ tumani diniy soha xodimlari ishtirok etdi.
Seminarda hududlarda olib borilayotgan ma’naviy-ma’rifiy ishlarning natijadorligi, aholi va oilalar bilan to‘g‘ridan to‘g‘ri muloqot qilish samaradorligi hamda yoshlar tarbiyasiga doir tadbirlar ijrosi atroflicha tahlil qilindi. Ayniqsa, «har bir xonadonga kirib borish» tamoyili asosida fuqarolarning diniy-ma’rifiy ehtiyojlarini o‘rganish va sog‘lom ma’naviy muhitni mustahkamlash zarurligi alohida qayd etildi.
Shu bilan birga, yaqinlashib kelayotgan ulug‘ ayyom — muborak Qurbon hayitini yuqori saviyada kutib olish va unga ko‘riladigan puxta tashkiliy tayyorgarlik masalalari ham muhokama markazida bo‘ldi.
Yig‘ilish yakunida barcha imom-xatiblarga zimmalaridagi mas’uliyatli vazifalarni sidqidildan bajarish, mahallalarda sog‘lom muhitni ta’minlash va xalqimizning diniy soha xodimlariga bo‘lgan ishonchini yanada mustahkamlash bo‘yicha zarur ko‘rsatmalar berildi.
Shuningdek, Qurbon hayiti namozi va tadbirlarini tinch-osoyishta, tartibli hamda yuqori saviyada o‘tkazish yuzasidan aniq topshiriq va tavsiyalar belgilab olindi.
O‘zbekiston musulmonlari idorasi
Matbuot xizmati
Shu kunlarda Ummon Sultonligining Masqat shahridagi "Hilton Muscat Al Bandar" majmuasida "Masqat harakatlar rejasi global forumi" (Muscat Plan Global Forum) bo‘lib o‘tmoqda. Joriy yilning 15-16 noyabr kunlariga mo‘ljallangan ushbu nufuzli anjumanda O‘zbekiston musulmonlari idorasi raisining birinchi o‘rinbosari Homidjon domla Ishmatbekov ham ishtirok etmoqda.
Mazkur xalqaro forum Birlashgan Millatlar Tashkilotining Genotsidning oldini olish va himoya qilish mas’uliyati bo‘yicha boshqarmasi (UNOSAPG), Ummon Sultonligi Vaqf va diniy ishlar hamda Tashqi ishlar vazirliklari, shuningdek, "Din va an’anaviy tinchlikparvarlar tarmog‘i" (The Network for Religious and Traditional Peacemakers) hamkorligida tashkil etilgan.
Tadbirning asosiy maqsadi kamsitish va zo‘ravonlikning oldini olish, shuningdek, o‘zaro muloqot, bag‘rikenglik va tinch-totuvlikni keng targ‘ib qilishda amaliy yondashuvlarni ishlab chiqishdan iborat.
E’tiborlisi, forumning asosiy tadbirlari Birlashgan Millatlar Tashkilotining Xalqaro bag‘rikenglik kuniga (16 noyabr) to‘g‘ri kelgan bo‘lib, bu o‘zaro hurmat va tinch-totuv yashash qadriyatlarini mustahkamlash uchun muhim platforma vazifasini o‘taydi.
Xalqaro tadbirda dunyoning turli davlatlaridan kelgan taniqli ulamolar, diniy va an’anaviy yetakchilar, hukumat vakillari, BMT va boshqa yirik xalqaro tashkilotlar mutasaddilari jam bo‘lgan. Forum dasturi doirasida muhim sessiyalar bo‘lib o‘tmoqda. Jumladan, tinchlik va xavfsizlikni ta’minlashda xalqaro hamkorlik mexanizmlari, nafratli nutqlarga qarshi kurashish hamda bag‘rikenglikni ilgari surishda diniy yetakchilar va ommaviy axborot vositalarining o‘rni kabi mavzularda yuqori darajadagi muhokamalar olib borilmoqda.
O‘zbekiston vakillarining bunday nufuzli xalqaro anjumanlardagi ishtiroki yurtimizda olib borilayotgan diniy-ma’rifiy sohadagi islohotlar, dinlararo bag‘rikenglik va tinchliksevarlik tamoyillarini jahon hamjamiyatiga yetkazishda muhim ahamiyat kasb etadi.
O‘zbekiston musulmonlari idorasi
Matbuot xizmati