Imom-xatiblar boshchiligida qabriston va ziyoratgohlar obod etilmoqda
Muborak Qurbon hayiti ayyomi arafasida yurtimiz bo‘ylab qadamjolar, ziyoratgohlar va qabristonlarni tartibga keltirish hamda obodonlashtirish ishlari keng quloch yoydi.
Xususan, joriy yilning 23–24 may kunlari respublikamizning barcha hududlarida bo‘lgani kabi Sirdaryo viloyatida ham xayriya hasharlari yuqori uyushqoqlik bilan tashkil etilmoqda.
Mazkur xayrli tashabbus doirasida Sirdaryo viloyatida faoliyat yuritayotgan imom-xatiblar va diniy soha xodimlari o‘zlariga biriktirilgan qabristonlarda hashar ishlarini boshlab yubordilar.
Hashar davomida quyidagi keng qamrovli ishlar amalga oshirilmoqda:
-
Hududlarni tozalash: Qabristonlar atrofi va ichi qurigan o‘t-o‘lanlardan, shox-shabbalardan hamda chiqindilardan butunlay tozalanmoqda;
-
Ko‘klamzorlashtirish: Ziyoratgohlar hududiga mahalliy iqlimga mos bo‘lgan manzarali daraxt ko‘chatlari, turfa xil gullar hamda fayz bag‘ishlovchi rayhonlar ekilmoqda.
Bu kabi tizimli ishlar natijasida viloyatdagi qabriston va ziyoratgohlar yanada obod, ozoda va fayzli maskanga aylantirilmoqda.
Xalqimizda o‘tganlarning xotirasini shod etish, ularning manzillarini ozoda saqlash azaldan muqaddas qadriyat va ulug‘ savobli amallardan sanaladi. Hayit oldidan o‘tkazilayotgan bunday hasharlar jamiyatimizdagi hamjihatlik va ajdodlar xotirasiga bo‘lgan yuksak hurmatning yorqin namunasidir.
O‘zbekiston musulmonlari idorasi
Sirdaryo viloyati vakilligi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
