Namangandagi “Mangulik” qabristonida xayriya hashari o‘tkazildi
Muborak Qurbon hayiti ayyomi arafasida Namangan shahridagi “Mangulik” qabristonida keng ko‘lamli obodonlashtirish hashari tashkil etildi.
Savobli tadbirda Namangan shahar hokimi Ayubxon Kamalov, “Nuroniy” jamg‘armasi viloyat bo‘limi raisi Ikromxon Najmiddinov, Mahallalar uyushmasi viloyat boshqarmasi boshlig‘i Ahadxon Mirzayev, viloyat imom-xatiblari, nuroniylar va mahalla faollari faol ishtirok etdilar.
Hashar davomida qabriston hududi chiqindilardan tozalanib, ariq-zovurlar ochildi, daraxtlar oqlandi hamda yo‘laklar tartibga keltirildi.
Shuningdek, bayram kunlari tashrif buyuruvchi ziyoratchilar uchun zarur shart-sharoitlar yaratildi.
Yoshlar va nuroniylarning hamjihatligida o‘tgan mazkur xayrli tadbir yakunida yurtimiz tinchligi, xalqimiz farovonligi va o‘tganlar ruhiga bag‘ishlab xayrli duolar qilindi.
O‘zbekiston musulmonlari idorasi
Namangan viloyati vakilligi
Matbuot xizmati
24–29 avgust kunlari Toshkentda “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum bo‘lib o‘tadi
24–29 avgust kunlari O‘zbekiston poytaxtida “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum o‘tkaziladi, deb xabar bermoqda “Dunyo” AA.
Tadbirning asosiy qismi O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar va media sohasi mutaxassislari jam bo‘ladi.
Forum dasturidan tantanali ochilish marosimi, yalpi majlislar, mavzuga oid media-ko‘rgazmalar, matbuot anjumanlari va ikki tomonlama uchrashuvlar o‘rin olgan. Sho‘ba yig‘ilishlari doirasida hujjatli kino va tarixiy xotira, nashriyot loyihalari, zamonaviy texnologiyalar, shuningdek, media sohasidagi xalqaro loyihalarni rivojlantirish masalalari muhokama qilinadi.
Bundan tashqari, O‘zbekiston talabalari uchun jahon media sanoatining yetakchi mutaxassislari ishtirokida mahorat darslari tashkil etiladi. Ishtirokchilar zamonaviy jurnalistika, media mahsulotlar yaratish va xalqaro axborot makonida samarali faoliyat yuritish borasida tajriba almashadi.
27 avgust kuni forum qatnashchilari uchun Samarqand shahriga sayohat uyushtiriladi. Dastur doirasida mehmonlar Imom Buxoriy majmuasini ziyorat qiladi va shaharning tarixiy-madaniy merosi bilan tanishadi. Shuningdek, Toshkent shahrida xorijiy OAV vakillari uchun maxsus media-tur o‘tkazilishi rejalashtirilgan.
Forum 28 avgust kuni yakuniy yalpi majlis va tantanali yopilish marosimi bilan o‘z ishini yakunlaydi. Xorijlik mehmonlar, O‘zbekiston davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlari idorasi Matbuot xizmati
