Diniy idora xodimlari beg‘araz donorlik aksiyasida faol ishtirok etdi
O‘zbekiston “Adolat” sotsial-demokratik partiyasi tashabbusi hamda Respublika qon quyish markazi hamkorligida O‘zbekiston musulmonlari idorasida ko‘chma qon yig‘ish xayriya tadbiri tashkil etildi.
“Bor mehrimiz senga, bolajon!” shiori ostida o‘tkazilayotgan beg‘araz donorlik aksiyasida Diniy idora xodimlari faol ishtirok etib, qonga muhtoj va bemor bolajonlar salomatligi yo‘lida o‘zlarining munosib hissalarini qo‘shdi. Xalqimizga xos mehr-muruvvat va saxovat ramzi bo‘lgan ushbu tadbir jamiyatda insonparvarlik g‘oyalarini keng targ‘ib etishga xizmat qiladi.
Tadbir doirasida O‘zbekiston “Adolat” SDP Siyosiy Kengashi raisi Robaxon Maxmudova boshchiligidagi partiya faollari O‘zbekiston musulmonlari idorasi faoliyati bilan yaqindan tanishdi. Mehmonlarga Idora xodimlari uchun yaratilgan sharoitlar, boy kitob fondiga ega kutubxona hamda ma’naviy-ma’rifiy ko‘rsatuvlar tayyorlanadigan zamonaviy media studiya faoliyati haqida ma’lumot berildi.
Uchrashuvda ma’naviyat, ma’rifat, ijtimoiy hamjihatlikni mustahkamlash va aholi orasida beg‘araz donorlik madaniyatini rivojlantirish yo‘lida hamkorlikni yanada kengaytirish muhimligi ta’kidlandi.
Partiya rahbariyati insonparvarlik aksiyasini yuqori saviyada tashkil etishda yaqindan ko‘maklashgan va unda faol ishtirok etgan O‘zbekiston musulmonlari idorasi rahbariyati hamda jamoasiga samimiy minnatdorlik bildirdi.
O‘zbekiston musulmonlari idorasi
Matbuot xizmati
Iordaniyada O‘zbekiston mustaqilligi bayrami munosabati bilan tadbir o‘tkazildi
Iordaniya poytaxtida O‘zbekiston mustaqilligining 35 yilligi munosabati bilan bayram tadbiri bo‘lib o‘tdi, deb xabar bermoqda “Dunyo” AA.
Tadbir O‘zbekistonning Ar-Riyoddagi elchixonasi tomonidan mamlakatimizning Iordaniyadagi faxriy konsuli Lauy Abug‘azaliy ko‘magida tashkil etildi.
Bayram tantanasida diplomatik korpus, Iordaniyaning davlat va jamoat tashkilotlari vakillari, taniqli ishbilarmonlar, yetakchi ommaviy axborot vositalari hamda o‘zbek diasporasi vakillari ishtirok etdi.
Uchrashuvda mehmonlar O‘zbekistonning mustaqillik yillarida erishgan yutuqlari, Prezident Shavkat Mirziyoyev rahbarligida amalga oshirilayotgan keng ko‘lamli islohotlar va zamonaviy ijtimoiy-iqtisodiy o‘zgarishlar natijalari bilan tanishtirildi.
Xalqaro hamkorlikni kengaytirish va O‘zbekistonning sarmoyaviy imkoniyatlariga alohida e’tibor qaratildi. Shu bilan birga, mamlakatimizning investitsion salohiyati, turizmni rivojlantirish, boy tarixiy-madaniy merosi hamda Islom sivilizatsiyasi markazi faoliyatiga bag‘ishlangan videoroliklar namoyish etildi.
Ishtirokchilar O‘zbekiston va Iordaniya o‘rtasidagi sayyohlik va gumanitar aloqalarni yanada rivojlantirishga xizmat qiladigan turizm imkoniyatlari, qadimiy shaharlar va madaniy obidalar bilan tanishish imkoniga ega bo‘ldi.
Eslatib o‘tamiz, 2025 yil 2 iyun kuni O‘zbekistonning qarorgohi Ar-Riyod shahrida bo‘lgan Iordaniyadagi elchisi Nodirjon Turg‘unov Qirol Abdulla II ibn al-Husaynga ishonch yorliqlarini topshirgandi.
O‘zbekiston musulmonlari idorasi Matbuot xizmati
- «
- »