Banda biror kasallikdan azob chekayotganda shifo sabablarini albatta izlashi shartdir. Bu borada shifokorga murojaat etish, dori-darmonlarni qabul qilish, sabrli bo'lish, shuningdek, kasallikning oldini olish talab etiladi.

Rivoyat qilinishicha, Rasululloh sollallohu alayhi vasallam Abu Qatoda roziyallohu anhuning haqqiga bunday duo qilganlar: “Allohim, uning yuzini yanada go'zal qilgin, sochlari va tanasini quvvatli qilgin”. Qatoda roziyallohu anhu 75 yoshida vafot etganida o'n besh yoshli yigitga o'xshardi.

Bir kuni Imom Qosim Kushayriy rahimahullohning o'g'li kasal bo'lib qoldi. Ota farzandining kasalligidan qattiq g'amga botdi. Kunlarning birida tushida Rasululloh sollallohu alayhi vasallamni ko'radi va o'g'liga shifo tilab duo so'raydi. Rasululloh sollallohu alayhi vasallam unga: “O'g'lingga shifo oyatlarini o'qi”, deydilar. Qosim Qushayriy rahmatullohi alayhi ularni o'qiydi va o'g'li tuzalib ketadi.

Shifo oyatlariga quyidagilar kiradi:

وَيَشْفِ صُدُورَ قَوْمٍ مُؤْمِنِينَ

1. “(Alloh) mo'minlar qavmi qalblariga shifo beradi”(Tavba surasi, 14-oyat).

يَا أَيُّهَا النَّاسُ قَدْ جَاءَتْكُمْ مَوْعِظَةٌ مِنْ رَبِّكُمْ وَشِفَاءٌ لِمَا فِي الصُّدُورِ وَهُدًى وَرَحْمَةٌ لِلْمُؤْمِنِينَ
 

1. “Ey, odamlar! Sizlarga Robbingizdan va'z (nasihat), dillardagi narsa (shirk va boshqa illatlar)ga shifo va mo'minlarga hidoyat va rahmat keldi”(Yunus surasi, 57-oyat).

يَخْرُجُ مِنْ بُطُونِهَا شَرَابٌ مُخْتَلِفٌ أَلْوَانُهُ فِيهِ شِفَاءٌ لِلنَّاسِ إِنَّ فِي ذَلِكَ لَآَيَةً لِقَوْمٍ يَتَفَكَّرُونَ
 

1. “Ularning (asalarilarning) qorinlaridan odamlar uchun shifo bo'lgan turli rangdagi sharbat (asal) chiqur. Albatta, bunda fikr yuritadigan qavm uchun alomat bordir”(Nahl surasi, 69-oyat).

وَنُنَزِّلُ مِنَ الْقُرْآَنِ مَا هُوَ شِفَاءٌ وَرَحْمَةٌ لِلْمُؤْمِنِينَ

1. “(Biz) Qur'ondan mo'minlar uchun shifo va rahmat bo'lgan (oyat)larni nozil qilurmiz”(Isro surasi, 82-oyat).

وَإِذَا مَرِضْتُ فَهُوَ يَشْفِينِ

1. “Kasal bo'lganimda, Uning O'zi menga shifo berur”(Shuaro surasi, 80-oyat).

قُلْ هُوَ لِلَّذِينَ آَمَنُوا هُدًى وَشِفَاءٌ

1. Ayting: “(Ushbu Qur'on) iymon keltirgan zotlar uchun hidoyat va (dildagi ma'naviy illat uchun) shifodir”(Fussilat surasi, 44-oyat).

Davron NURMUHAMMAD