Ochiq ko‘ngil bandaga Alloh rahm qilsin
Intiqom mahkamasiga aylansangiz eng avvalgi qurbon o‘zingiz bo‘lasiz
Ba’zi insonlar juda ochiqko‘ngil bo‘lishadi. Ular o‘zlarining barcha haqlarini talab qilishmaydi, ko‘p ishlarga ahamiyat berishmaydi, gohida o‘zlarini bilmaganga olishadi. Umuman olganda ochiqko‘ngil, ko‘p narsani aniqlashtirishga urinaverishmaydi, har qanday gapga e’tibor qilaverishmaydi va o‘zlarini bunday mayda ishlar bilan qiynashmaydi. Yana shunday insonlar borki, yuqoridagi insonlarning aksi. Ochiqko‘ngillik nima ekanini bilishmaydi, zarra miqdorida bo‘lsin haqlari birovga o‘tib ketishiga yo‘l qo‘yishmaydi, insonlar bilan doimo haq talashib janjallashadi, kurashadi va kamdan-kam hollarda rozi bo‘lishadi.
Tabiiyki, ochiqko‘ngil insonning ko‘ngli xotirjam, iztirobdan yiroq bo‘ladi. Shuningdek, u insonlarning qalbiga yaqin, ularning muhabbatlariga munosib bo‘ladi. Insonlar bilan doimiy janjallashib yuradigan kishidan farqli ravishda uning qarshisida muvaffaqiyat eshiklari doim ochiq turadi. Ikkinchi toifadagi inson esa barcha gaplar va voqealarni tahlil qiladi, ulardan yaramas maqsadlarni izlaydi. Shu sababli o‘ziga turli tarafdan iztirobni jalb qiladi, insonlar uni yomon ko‘rishadi va o‘zlarini olib qochishadi.
Aslida, Rasululloh sollallohu alayhi vasallam agar ikki ishdan biriga ixtiyor berilsa modomiki gunoh bo‘lmas ekan yengilini tanlardilar, agar gunoh bo‘lsa undan uzoqlashadilar. U zot aytadilar:
قال رسول الله صلى الله عليه و سلم: رحم الله عبدا سمحا إذا باع، سمحا إذا اشترى، سمحا إذا اقتضى
“Alloh (biror narsa) sotsa, sotib olsa va (haq) talab qilsa ham ochiq ko‘ngil bo‘ladigan bandaga rahm qilsin” (Imom Buxoriy rivoyati).
Shu’la: Ertaga iztirob chekmasligingiz uchun bugun qattiq harakat qiling.
Doktor Oiz al-Qarniyning
"Dunyodagi eng baxtli ayol" kitobidan
“Orta Lectura”: O‘zbekiston xavfsiz sayyohlik yo‘nalishi sifatida o‘z mavqeini mustahkamlamoqda
Ispaniyaning “Orta Lectura” nashrida O‘zbekistonda turizm sohasida amalga oshirilayotgan islohotlarga bag‘ishlangan maqola e’lon qilindi, deb xabar bermoqda “Dunyo” AA.
Maqolada qayd etilishicha, so‘nggi yillarda O‘zbekiston turli nufuzli xalqaro reytinglarda hamda xorijiy davlatlarning sayyohlar uchun tavsiyalarida yuqori xavfsizlik darajasiga ega mamlakatlardan biri sifatida e’tirof etilmoqda.
World Justice Project (WJP) tomonidan e’lon qilingan “Rule of Law Index 2025” natijalariga ko‘ra, O‘zbekiston “Tartib va xavfsizlik” ko‘rsatkichi bo‘yicha 143 ta mamlakat orasida 17-o‘rinni, Sharqiy Yevropa va Markaziy Osiyodagi 15 ta mamlakat orasida esa 1-o‘rinni egalladi.
WJP indeksi 215 mingdan ortiq fuqarolar hamda 4 ming 100 nafardan ziyod huquqshunos va ekspertlar o‘rtasida o‘tkazilgan so‘rovnomalarga asoslangani bilan ahamiyatlidir.
“Gallup” kompaniyasining “2025 Global Safety Report” ma’ruzasida ta’kidlanishicha, O‘zbekiston aholisining 86 foizi kechasi yolg‘iz yurganda o‘zini to‘liq xavfsiz his qiladi. Bu ko‘rsatkich dunyo bo‘yicha o‘rtacha 73 foizlik darajadan sezilarli darajada yuqoridir. Shu bilan birga, “Law and Order Index”ning kengroq ko‘rsatkichi bo‘yicha mamlakatimiz 100 dan 91 ball to‘pladi.
Institute for Economics & Peace tomonidan tuziladigan “Global Peace Index 2026” natijalariga ko‘ra, O‘zbekiston o‘z pozitsiyasini 30 pog‘onaga yaxshilab, 163 ta mamlakat orasida 1,726 ko‘rsatkich bilan 37-o‘ringa ko‘tarildi. 2026 yilgi rasmiy hisobotda mamlakatimiz tinchlik ko‘rsatkichlari eng yuqori sur’atda yaxshilangan davlatlar qatoriga kiritildi.
AQSH Davlat departamenti “Travel Advisories” tizimida O‘zbekistonga “Level 1 – Exercise Normal Precautions” darajasini, ya’ni “Odatiy ehtiyot choralariga rioya qilish” tavsiyasini bergan. 2026 yil yanvarda yangilangan tavsiyanomada xavf darajasi oshirilmadi. Bu AQSH Davlat departamenti tomonidan xalqaro sayohatlar uchun belgilanadigan eng past xavf darajasi hisoblanadi.
O‘zbekiston musulmonlari idorasi Matbuot xizmati
