Xalqaro forumda Imom Buxoriy haqidagi muhim asar taqdimot qilindi
#taqdimot #forum #kitob
Avval xabar qilinganidek, mamlakatimizda "Islom sivilizatsiyasi: tinchlik, bag‘rikenglik va ilm-ma’rifat yo‘li" mavzusidagi I Xalqaro islom sivilizatsiyasi forumi bo‘lib o‘tdi.
Samarqand shahrida o‘tkazilgan ushbu nufuzli anjuman Imom Buxoriy rahimahulloh merosini xalqaro miqyosda keng targ‘ib qilish, islom ilmlari bo‘yicha tadqiqotlarni rivojlantirish, xorijiy ilmiy markazlar bilan hamkorlikni mustahkamlash hamda yosh tadqiqotchilar uchun yangi ilmiy muloqot maydonlarini yaratishga xizmat qildi.
Forum doirasida O‘zbekiston musulmonlari idorasi Buxoro viloyati vakili, "Imom Buxoriy" ordeni sohibi, Ulamolar kengashi a’zosi, Mir Arab oliy madrasasi rektori Jobir domla Elov muallifligida nashr etilgan "Imom Buxoriy – muhaddislar faxri" kitobi taqdimoti bo‘lib o‘tdi.
Asarda buyuk muhaddis Imom Buxoriy rahimahullohning hayoti, ilmiy merosi, yuksak axloqi hamda Islom tamadduni rivojiga qo‘shgan beqiyos hissasi sodda va ravon uslubda yoritilgan.
Kitob Imom Buxoriy rahimahullohning ilmga sadoqati, taqvosi va mashaqqatli ilmiy safarlarini o‘quvchiga yaqindan tanishtirib, ma’naviy-ma’rifiy jihatdan muhim manba bo‘lib xizmat qiladi.
O‘zbekiston musulmonlari idorasi
Matbuot xizmati
«Qur’on tinchlikka buyuradi»
O‘zbekiston davlat mustaqilligining 35 yilligi munosabati bilan «Qur’on tinchlikka buyuradi» shiori ostida Samarqand shahridagi "Obi Rahmat" jome masjidida Qur’on musobaqasi tashkil etildi. Qur’oni karimga bo‘lgan muhabbatni yuksaltirish, qiroat va tajvid ilmlarini keng targ‘ib etish hamda jamiyatda tinchlik va osoyishtalik g‘oyalarini mustahkamlashga xizmat qiluvchi ushbu xayrli tadbirning saralash bosqichlaridan o‘tgan ishtirokchilar «Hifz» va «Mujavvid» yo‘nalishlari bo‘yicha bellashdi.
G‘olib va sovrindorlar:
«Hifz» yo‘nalishi:
1-o‘rin: Asqar Tursunov (Samarqand shahri, «Muhammadamin ota» masjidi imom-noibi);
2-o‘rin: Abduvakil Olimov (Urgut tumani, «G‘avsul A’zam» masjidi imom-xatibi);
3-o‘rin: Shavkat Mahmudov (Narpay tumani, «So‘fi Ziyrak» masjidi imom-xatibi).
«Mujavvid» yo‘nalishi:
1-o‘rin: Zikrullo Matlabov (Samarqand shahri, «Xo‘ja Abdu Darun» masjidi imom-noibi);
2-o‘rin: Burxoniddin Tursunov (Nurobod tumani, «Jom ota» masjidi imom-xatibi);
3-o‘rin: Isomiddin Isayev (Paxtachi tumani, «Xo‘ja Ziyovuddin» masjidi imom-xatibi).
Qo‘shimcha nominatsiyalar:
«Eng ta’sirchan tilovat»: O‘tkir Abdullayev (Pastdarg‘om tumani);
«Eng go‘zal tilovat»: Sardorxon Sobirov (Samarqand tumani);
«Tajvid qoidalariga eng mukammal rioya qilgan ishtirokchi»: Yusufxon Nizomov (Samarqand shahri).
Tadbir yakunida g‘oliblarga O‘zbekiston musulmonlari idorasi viloyat vakilligining diplomlari va «Vaqf» fondi filiali tomonidan qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
