I Xalqaro Islom sivilizatsiyasi forumi Turkiya axborot maydonida keng yoritildi
Mamlakatimizda ilk bor o‘tkazilgan I Xalqaro Islom sivilizatsiyasi forumi Turkiya ommaviy axborot vositalari diqqat markazida bo‘ldi, deb xabar bermoqda “Dunyo” AA.
Xususan, “Anadolu”, “TRT-Haber”, “TRT-Avaz”, “Haber7”, “Hibya”, “RHA Ajans”, “Türkiye”, “Yeni Şafak” kabi yetakchi turk OAV mazkur anjuman haqida turkum tahliliy maqolalar e’lon qildi.
Turk nashrlari global geosiyosiy inqirozlar, radikalizm va islomofobiya kabi tahdidlar kuchaygan hozirgi sharoitda Toshkentdan yangragan konstruktiv chaqiriqlar butun insoniyat uchun strategik sheriklik va Sharq bilan G‘arb o‘rtasidagi muloqot poydevori bo‘lib xizmat qilishini alohida e’tirof etgan.
Maqolalarda O‘zbekiston Prezidenti Shavkat Mirziyoyevning forum delegatlariga yo‘llagan murojaati anjumanning konseptual asosini belgilab bergani hamda Yangi O‘zbekiston g‘oyasi doirasidagi “Uchinchi Renessans” va “Jaholatga qarshi ma’rifat” tamoyillarini yuksak baholagan.
Sammit doirasida noyob qo‘lyozmalarni raqamlashtirish va Islom kutubxonalarining xalqaro ittifoqini tuzish kabi 70 dan ortiq aniq amaliy loyihalar ko‘rib chiqildi.
Turkiya Prezidenti Rejep Tayyip Erdo‘g‘onning anjumanga yo‘llagan murojaatiga ham alohida e’tibor qaratilgan. Turkiya yetakchisi o‘z murojaatida ushbu tashabbus nafaqat O‘zbekiston, balki butun islom olami uchun ulkan ahamiyatga ega ekanini ta’kidlagan.
“Muhtaram Prezident janoblari, Sizning oqilona rahbarligingizda O‘zbekiston nafaqat o‘zining buyuk kelajagini barpo etmoqda, balki Islom tamaddunining tinchlik, ezgulik va birodarlik g‘oyalarini dunyoga baralla tarannum etuvchi tarixiy missiyaning peshqadami va bayroqdori bo‘lib maydonga chiqmoqda”, – deya e’tirof etgan Turkiya Prezidenti.
O‘zbekiston musulmonlari idorasi Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »