Xorijliklar uchun diniy ta’lim muassasalarimizga qabul davom etmoqda
Avval xabar berganimizdek, shu yil 30 iyundan boshlab O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalariga 2026-2027 o‘quv yili uchun abituriyentlardan hujjatlar qabul qilinmoqda.
Jumladan, xorijlik fuqarolarni oliy va o‘rta maxsus islom ta’lim muassasalariga qabul qilish ham amalga oshirilmoqda. Ayni paytda xorijlik fuqarolarni o‘qishga qabul qilish Imom Buxoriy nomidagi Toshkent islom instituti va “Ko‘kaldosh” o‘rta maxsus islom ta’lim muassasasida joriy etilgan.
Xorijlik fuqarolar diniy ta’lim muassasalariga o‘qishga kirish uchun quyidagi hujjatlarni taqdim etadi:
– Qabul hay’ati raisi nomiga ariza;
– ma’lumoti haqidagi hujjatlarning asl nusxasi;
– sog‘lig‘i to‘g‘risidagi tibbiy xulosa;
– milliy pasport (amaldagi vizasi bilan);
– 6 dona rangli fotosurat (3,5 x 4,5 hajmdagi);
– fuqaroligi bo‘lgan mamlakatning muftiysi (Agar o‘sha yurtda bunday lavozim bo‘lmagan taqdirda din ishlari bo‘yicha tegishli davlat boshqaruvi organi) tomonidan berilgan tavsiyanoma (yoki yo‘llanma).
Xorijlik fuqarolar diniy ta’lim muassasalariga O‘zbekiston musulmonlari idorasi tomonidan o‘tkaziladigan ijodiy suhbat (imtihon) natijalariga ko‘ra o‘qishga qabul qilinadi.
Mazkur imtihon xorijlik fuqarolarni o‘qishga qabul qilish bo‘yicha O‘zbekiston musulmonlari idorasi tuzilgan Maxsus komissiya tomonidan amalga oshiriladi.
Eslatib o‘tamiz, diniy ta’lim muassasalariga 2026 yil 20 iyulgacha davom etadi.
O‘zbekiston musulmonlari idorasi
Matbuot xizmati
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
- «
- »