Boy tarixiy meros O‘zbekistonning Yaqin Sharq sayyohlari orasidagi jozibadorligini yanada oshirmoqda
Iordaniya va O‘zbekiston poytaxtlari o‘rtasida tarixda ilk bor yo‘lga qo‘yilgan to‘g‘ridan to‘g‘ri aviaqatnov turizm sohasidagi ikki tomonlama hamkorlikni yangi bosqichga olib chiqmoqda, deb xabar qiladi “Dunyo” AA.
Mazkur yo‘nalishning birinchi reysi bilan O‘zbekistonga Iordaniyadan 40 nafarga yaqin turistdan iborat uyushgan guruh tashrif buyurdi. Safar davomida mehmonlar Toshkent, Samarqand va Buxoro shaharlarida bo‘lib, mamlakatimizning boy tarixiy-madaniy merosi, YUNЕSKOning Butunjahon merosi ro‘yxatiga kiritilgan obidalar, milliy taomlar va o‘zbek xalqining qadimiy an’analari bilan tanishdi.
Iordaniyalik sayyohlar mamlakatimizdagi mehmondo‘stlik, zamonaviy turistik infratuzilma va yuqori xizmat ko‘rsatish darajasini alohida e’tirof etdi. Ayniqsa, Samarqand va Buxoroning me’moriy obidalari, Toshkentning zamonaviy qiyofasi ularda katta taassurot qoldirdi.
Mutaxassislar fikricha, Ammon–Toshkent aviaqatnovining yo‘lga qo‘yilishi o‘zaro turistik almashinuvni kengaytirish uchun yangi imkoniyatlar ochmoqda. Boy tarixiy meros, rivojlangan turistik infratuzilma, Iordaniya fuqarolari uchun vizasiz tartib hamda xalqaro aviaqatnovlar tarmog‘ining kengayishi O‘zbekistonning Yaqin Sharq sayyohlari orasidagi jozibadorligini yanada oshirmoqda.
Ayni paytda ikki mamlakat o‘rtasida madaniy-ma’rifiy, gastronomik, oilaviy va ziyorat turizmi yo‘nalishlarini qamrab olgan yangi qo‘shma turistik dasturlarni ishlab chiqish rejalashtirilgan.
O‘zbekiston musulmonlari idorasi Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati