Shu yilning boshida Madaniyat va turizm vazirligi hamda Samarqand viloyat hokimi o'rinbosari R.Qobilov boshchiligidagi delegatsiya a'zolari Malayziya hamda Indoneziyada bo'lib qaytgandi.
“Zarafshon” nashri bildirishicha, tashrif davomida o'zbekistonlik delegatsiya a'zolari Indoneziyaning “NET MEDIA” media tashkiloti rahbari Eko Yuvono bilan ham uchrashib, O'zbekistonning sayyohlik salohiyatini namoyish etish bo'yicha kelishuvga erishgan edi. Ushbu kelishuv sabab, yaqinda Samarqandga mazkur media kanallardan bir guruh jurnalistlar kelib, mamlakatimizda boshqa davlatlarning musulmon ahli ziyorat etishi mumkin bo'lgan tarixiy obidalar, ziyoratgohlar haqida hujjatli fil'm tayyorlamoqda.
- Samarqandning juda ko'p tarixiy hududlarini ko'rdik, tasvirga oldik, - deydi Muslim Travelers kanali muxbiri Chiki Fawzi. – Mazkur lavhalarimiz aynan Ramazon oyida efirga uzatilishini hisobga olgan holda bu erdagi buyuk allomalar xoki poylari yotgan muqaddas qadamjolardan, Imom Buxoriy majmuasidan ko'proq lavhalar tayyorlashga harakat qilayapmiz. Samarqandga birinchi kelishim, bu shahar menda o'zgacha taassurot uyg'otdi. Odamlar juda xushmuomala, taomlari esa har qanday shirintomoq kishilarni sehrlab qo'yadi. Samarqanddan so'ng Buxoroga ham borib, u erdagi tarixiy obidalarni ham tasvirga olishni rejalashtirganmiz.
Indoneziyada 250 millionga yaqin aholi istiqomat qiladi. Keyingi yillarda mamlakatimizda ziyorat turizmi borasida salmoqli ishlar amalga oshirilmoqda. Bu borada bir necha xalqaro anjumanlar o'tkazildi, ko'p sonli musulmonlar istiqomat qiladigan davlatlar bilan turizm bo'yicha o'zaro aloqalar o'rnatildi.

O'zbekiston musulmonlari idorasi matbuo xizmati