Diniy idora vakillari Malayziyada tajriba almashmoqda
So'nggi yillarda Malayziya va O'zbekiston munosabatlari tobora mustahkamlanib, o'zaro aloqalar ko'lami kengayib bormoqda. Yaqinda Samarqanda viloyati delegatsiyasining ushbu mamlakatga bo'lgan tashrifi ham ana shu hamkorlikni yanada yaxshilashga xizmat qildi.
Shu kunlarda Samarqand viloyati delegatsiyasi Malayziya davlatida xizmat safarida bo'lib, mamlakatimizning turizm salohiyatini yanada oshirish, "Samarqand" brendini keng targ'ib qilish, ziyorat turizmi masalalarini muhokama etish maqsadida Malayziyaning bir qator shtat ma'muriyati rahbarlari bilan muloqotlar o'tkazmoqda. Shuningdek, diniy soha va oliy ta'lim muassasalari mas'ullari bilan tajriba almashib, o'zaro aloqalarni rivojlantirish bo'yicha kelishuvlarga erishilmoqda.
Hususan, tashrif davomida Zayniddin domla Eshonqulov hamda Hadis ilmi oliy maktabi rektori Olimxon domla Yusupovlar Malayziyaning Perlis shtatiga tashrif buyurib, ushbu viloyat diniy idorasi xodimlari va imom-xatiblari bilan uchrashdilar.
O'zaro muloqotda ta'lim muassasalari faoliyati va diniy soha doirasida amalga oshirilayotgan ishlar xususida so'z yuritildi. Jumladan, Malayziya tomoni O'zbekistonda barcha sohalarda bo'layotgan yangilanishlarni ijobiy baholab, ikki tomonlama hamkorlikni rivojlantirish manfaatli bo'lishini qayd etishdi. Shuningdek, ziyorat turizmi masalalari ham alohida muhokama etildi.
O'zbekiston musulmonlari idorasi Matbuot xizmati
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati
