Islomning birinchi masjidi kengaytirilmoqda
Madina hokimligi payg'ambarimiz Muhammad sollallohu alayhi va sallam vasallam tamal toshini qo'ygan ilk ibodatgoh – Qubo masjidini kengaytirishning birinchi bosqichi boshlanganini e'lon qildi.
Loyihani amalga oshirish uchun Madinada Qubo masjidining hozirgi binosi yaqinida joylashgan 200 ta ko'chmas mulk ob'ektlari buziladi, deb xabar beradi Saudi Gazette nashri.
Masjidning kengayishi natijasida uning umumiy maydoni 10 barobar oshiriladi va 66 000 namozxonni sig'dira oladi. Bu loyihaga ko'ra, Qubo masjidi sig'imiga ko'ra Makkadagi Masjidul Harom va Madinadagi Masjidun Nabaviydan keyin uchinchi yirik masjidga aylanadi.
Qubo masjidi Islom tarixida Madinada qurilgan birinchi masjiddir. U 622 yilda qurilgan va Masjidun Nabaviydan 5 km uzoqlikda joylashgan.
O'zbekiston musulmonlari idorasi matbuot xizmati
“Rossiyskaya gazeta”: Islom sivilizatsiyasi markazi Yangi O‘zbekistonning ma’naviy-intellektual yuksalishiga xizmat qilmoqda
“Rossiyskaya gazeta”sida “Uchinchi Renessans: Islom sivilizatsiyasi markazi Yangi O‘zbekistonning ma’naviy-intellektual yuksalishiga xizmat qilmoqda” nomli tahliliy maqola chop etildi, deb xabar bermoqda “Dunyo” AA muxbiri.
Nashrda Toshkentda barpo etilgan Islom sivilizatsiyasi markazi ilm-fan, ta’lim va zamonaviy raqamli texnologiyalarni birlashtirgan yirik madaniy-ma’rifiy platforma sifatida taqdim etilgan. Poytaxtimizda qariyb 10 gektar maydonni egallagan va VII asrga oid muqaddas Usmon Qur’onini saqlaydigan ushbu majmuaning tashkil etilishi Prezident Shavkat Mirziyoyev tomonidan BMT Bosh Assambleyasining 72-sessiyasida islom dinining ma’rifiy mohiyatini targ‘ib qilish bo‘yicha ilgari surilgan tashabbusi bilan bevosita bog‘lanadi. Uchinchi Renessans konsepsiyasi va Sharqning buyuk allomalari merosi orqali maqolada mamlakat ilmiy taraqqiyotining uzviyligi - qadimgi kashfiyotlardan tortib sun’iy intellekt, VR va AR-texnologiyalari qo‘llanilgan interaktiv ekspozitsiyalargacha keng yoritilgan.
Shuningdek, nashrda Toshkent va Samarqand shaharlarida bo‘lib o‘tgan “Islom sivilizatsiyasi: yangi nigoh — yangi kashfiyotlar” xalqaro mediaforumi yakunlari, unda 20 ga yaqin bitimlar imzolangani ta’kidlangan. Ular orasida Xalqaro mediaalyans tuzish, “Sivilizatsiya ovozi” tanlovini ta’sis etish hamda milliy artefaktlarni xorijdan qaytarish bo‘yicha ishlarni amalga oshirish to‘g‘risidagi qarorlar o‘rin olgan bo‘lib, bu O‘zbekiston madaniy merosini dunyoda tizimli targ‘ib qilish uchun mustahkam zamin yaratadi.
O‘zbekiston musulmonlari idorasi Matbuot xizmati
