Muftiy Boboxonovlar sulolasining ibratli hayot yo'li yodga olindi
Kecha, 12 sentyabr' kuni O'zbekiston musulmonlari idorasida “Islom ma'rifati va madaniyati rivojiga beqiyos hissa qo'shgan Boboxonovlar sulolasi merosini o'rganish va keng targ'ib etish” mavzusida ilmiy-ma'rifiy suhbat bo'lib o'tdi.
Tadbirda O'zbekistondagi Islom tsivilizatsiyasi markazi etakchi ilmiy xodimi Shayx Abdulaziz Mansur hazratlari, Muftiy Boboxonovlar sulolasi vakilasi, Toshkent davlat sharqshunoslik universiteti dotsenti Muxlisa Ziyovuddin qizi, O'zbekiston musulmonlari idorasi raisi o'rinbosari Ibrohimjon domla Inomov hamda Diniy idora xodimlari ishtirok etdi.
Marosim Qur'oni karim tilovati va xayrli duolar bilan boshlandi.
Ma'rifiy uchrashuv avvalida Shayx Abdulaziz Mansur hazratlari yurtimiz mo'min-musulmonlari tomonidan katta ehtirom bilan yodga olinadigan Muftiy Boboxonovlar sulolasi vakillari o'ta mashaqqatli yillarda yurtimizdagi diniy-ma'rifiy soha rivoji yo'lida beqiyos xizmatlar qilganlari haqida so'z yuritdi.
Shundan so'ng Muxlisa Ziyovuddin qizi Muftiy Boboxonovlar sulolasi vakillari, diniy idora asoschilari, marhum muftiylar – Eshon Boboxon ibn Abdulmajidxon, Shayx Ziyouddinxon ibn Eshon Boboxon va Shamsiddinxon Boboxonovlar faoliyati sho'rolar davlatida qaltis bir davrda mintaqamizdagi beshta respublika musulmonlarining muftiysi bo'lib, bu muhim va mas'uliyatli vazifani ham a'lo darajada bajarganlari, Sobiq ittifoq davrida diniy ulamolar taqibga uchrab, turli tazyiqlarga qolgan damlarda ham u zotlar yopilgan masjidlarni ochish, buzilib yotganlarni ta'mirlash, diniy tadbirlarni o'tkazish, fuqarolarning haj safarlariga ruxsat olishga erishganlari haqida gapirib berdi.
Tadbir davomida Muftiy Boboxonovlarning ulkan xizmatlaridan biri Buxoro shahridagi Mir Arab madrasasi va Toshkentda Islom oliy ma'hadining ochilishi, bu ilmu fan o'choqlari nafaqat O'rta Osiyo va Qozog'iston, balki Rossiyaning Yevropa qismi va Sibir, Kavkazorti, Shimoliy Kavkaz diniy muassasalari uchun ham kadrlar tayyorlagani, mazkur o'quv yurtlarini bitirib chiqqanlar orasida taniqli din arboblarining borligi, Muftiy Boboxonovlar xalqaro aloqalarni o'rnatish va rivojlantirishga ham e'tibor berganlari, bunda ular, birinchidan, turli musulmon mamlakatlarida o'tkazilgan xalqaro anjumanlarda ishtirok etib, o'sha davrlarning dolzarb masalalari yuzasidan ma'ruza qilgan bo'lsalar, ikkinchidan, ko'plab din va davlat arboblari bilan aloqa o'rnatganlari, Muftiy Boboxonovlar ishtiroki bilan o'sha davrlarda arab mamlakatlari va islom dini tarqalgan 80 ta davlat bilan mamlakatimiz o'rtasidagi munosabatlar yaxshilanib, diniy aloqalar kengaygani ta'kidlandi.
Ma'naviy-ma'rifiy tadbir davomida keyingi yillarda hukumatimiz ko'magida Muftiy Boboxonovlar sulolasi haqida hujjatli fil'm, ko'rsatuv, kitob, ommabop risola va turkum maqolalar chop etilib, ularning dinimiz, yurtimiz ravnaqi yo'lida qilgan ishlarini keng ommagan targ'ib qilinayotgani, bu esa u zotlarning yorqin xotirasiga hurmat-ehtirom va ularning xayrli amallari doim el yodida ekanligi qayd etildi.
Tadbir so'ngida Ibrohimjon domla Inomov muhtaram mehmonlarga O'zbekiston musulmonlari idorasining esdalik sovg'alarini topshirdi.
O'zbekiston musulmonlari idorasi Matbuot xizmati
Ozarbayjonlik jurnalistlar Samarqanddagi Imom Buxoriy maqbarasini ziyorat qildi
"Report" xabariga ko‘ra, tashrif O‘zbekiston bo‘ylab media-tur doirasida bo‘lib o‘tdi.
Imom Buxoriy maqbarasi Samarqand viloyatidagi eng muhim ma’naviy va tarixiy obidalardan biridir.
Tashrif davomida Ozarbayjon ommaviy axborot vositalari vakillari Imom Buxoriy maqbarasi, masjid, muzey va kutubxona vazifasini bajaruvchi xonani o‘z ichiga olgan yodgorlik majmuasi hududi bilan tanishdi. Jurnalistlarga majmuaning yaratilish tarixi, Imom Buxoriy hayoti va ilmiy merosi, shuningdek, uning islom ilm-fanidagi alohida o‘rni haqida so‘zlab berildi.
Media-tur ishtirokchilari majmuaning muzey qismiga alohida e’tibor qaratdi. Bu yerda islom madaniyati va Imom Buxoriy merosiga oid qo‘lyozmalar va turli tarixiy materiallar taqdim etilgan. Shuningdek, muzeyda turli mamlakatlar vakillari tomonidan majmuaga sovg‘a qilingan Qur’oni karim nusxalari ham saqlanadi.
Ishtirokchilarga majmua turli mamlakatlardan kelgan dindorlar uchun ziyoratgoh va allomaning ma’naviy merosini asrab-avaylashning muhim markazi ekanligi haqida so‘zlab berildi. Jurnalistlar majmuaning me’moriy xususiyatlari va tashrif buyuruvchilar uchun yaratilgan zamonaviy infratuzilma bilan ham tanishdi.
Imom Buxoriy eng nufuzli islom ulamolaridan biri va islom an’anasidagi eng muhim hadis to‘plamlaridan biri bo‘lgan "Sahih al-Buxoriy" hadislar to‘plamining muallifi hisoblanadi.
O‘zbekiston musulmonlari idorasi Matbuot xizmati
