Yangi hijriy 1444 yilning ilk kunida “Ka'bapo'sh – Kisva” almashtirildi
Ikki Muqaddas Haram masjidlari rahbariyati idorasining ma'lum qilishicha, yangi hijriy sana boshlanishi munosabati “Ka'bapo'sh – Kisva” shanba kuni yangisiga almashtiriladi. Mazkur yillik tadbirda Ikki Muqaddas Haram masjidlari idorasi rahbari, shayx Abdurrohmon As-Sudays boshchiligidagi 166 nafar texnik xodimlar va hunarmand ishtirok etdi.
As-Sudays Saudiya Arabistoni rahbariyatining Ka'bani asrab-avaylashga katta e'tibor qaratayotganini ta'kidladi.
Podshoh Abdulaziz nomidagi “Ka'bapo'sh – Kisva” majmuasida turli bo'limlarda, jumladan, bo'yash va avtomatik to'qish, qo'lda to'qish, bosmalash, tikish va yig'ish bo'limlari hamda Ka'ba kamari va oltin bo'limida 200 ga yaqin hunarmand va ma'murlar mehnat qildi.
Tikuv ustaxonasida uzunligi 16 metr bo'lgan, kom'pyuter tizimi bilan ishlaydigan dunyodagi eng uzun tikuv mashinasi joylashgan.
“Ka'bapo'sh – Kisva” tayyorlanish jarayonida qora rangga bo'yalgan 670 kg xom ipak, 120 kg oltin sim va 100 kg kumush simdan foydalanildi.
O'MI Halqaro aloqalar bo'limi
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
