Savol: Bir video ko‘rdim. Unda ziyoratchilar Masjidul haromga kirib, ka’ba ko‘rinadigan joyga kelgunicha boshlarini egib, ko‘zlarini yumib kelishmoqda. Yaqin kelgandan keyin ellikboshi boshlaringni ko‘taringlar dedi. Shunchalik qilish shartmi?

Javob: Bismillahir Rohmanir Rohiym. Shariatimizdagi har bir amal ilmga asosan bajariladi. Ko‘r-ko‘rona, o‘zgalarga taqlid qilish orqali qilinmaydi.
Ular qilayotgan bu amalning hech qanday shar’iy asosi yo‘q. Fiqhiy manbalarimizda Ka’bani ko‘rganda aytiladigan zikrlar va duolar bayon qilingan, Ka’bani ko‘rganda qilinadigan duolar ijobat bo‘lishi aytilgan, ammo ularning birortasida boshini egib, ko‘zlarini yumib kirsin degan gap kelmagan. Masjidul haromga kirib kelayotgan ziyoratchiga Ka’ba qayerda ko‘rinsa o‘sha yerda duo va zikrlarni qilaveradi.
Oisha roziyallohu anhodan rivoyat qilingan hadisi sharifda Rasululloh sollallohu alayhi vasallam: “Kim bizning bu ishimizda undan bo‘lmagan narsani yangidan paydo qilsa, u rad etilgandir”, deganlar (Imom Buxoriy va Imom Muslim rivoyati).
Bundan tashqari Ka’ba Buyuk Zotning yerdagi muazzam va ulug‘vor bayti hisoblanadi. Uni birinchi bor ko‘rganda insonlarning aqli lol bo‘ladi, ayrimlari hushi yo‘qotib qo‘yadi. Shu bois uni bir lahzada, yaqinida emas, uzoqdan ko‘rib, o‘zini tayyorlab keladi.

O‘zbekiston musulmonlari idorasi
Fatvo markazi.