Mamlakatimiz elchixonasi O'zbekiston islom tsivilizatsiyasi markazi (O'ITsM) direktori Shoazim Minovarov va Malayziya Islom san'ati muzeyi bosh kuratori Heba Nael' Barakat o'rtasida onlayn muzokaralarni tashkil etdi, deb xabar bermoqda «Dunyo» axborot agentligi.

Malayziya tomoni O'zbekistonda bag'rikenglik madaniyatini rivojlantirish va islom dinining gumanistik mohiyatini targ'ib etish, islom tsivilizatsiyasining jahon ilm-fani va madaniyati rivojiga qo'shgan salmoqli hissasini o'rganish va ommalashtirish borasida amalga oshirilayotgan keng ko'lamli chora-tadbirlarga yuksak baho berdi. Malayziya muzeyi vakillari O'ITsMning ushbu yo'nalishdagi vazifalari va ilmiy majmua va O'ITsM muzeyi qurilishining borishi bilan tanishishdi.

Muloqot chog'ida ikkala muzey fondlarida saqlanayotgan moddiy madaniyat ob'ektlari va qo'lyozmalarning qo'shma ko'rgazmalarini tashkil etish orqali islom dunyosining ilmiy va madaniy merosini targ'ib qilish bo'yicha qo'shma loyihalarni amalga oshirish rejalari muhokama qilindi.

O'zbekiston musulmonlari idorasi Matbuot xizmati