Ziyoratchilar bilan hajga tayyorgarlik davom etmoqda
Musulmon farzandi borki, umrida bir bor bo'lsa-da, Allohning uyi — Ka'batullohni tavof qilish orzusida yuradi. O'zbekistonlik ziyoratchilarning oxirgi guruhlari Madina ziyoratini yakunlab, sog'u salomat Makka shahriga etib kelmoqdalar. Baytullohni tavof qilib, umra amalini bajarmoqdalar.
Bu yil 12 ming nafardan ziyod hamyurtimiz Saudiya Arabistonining ikki muqaddas shahrida bo'lib, ayni kunlarda islomning beshinchi arkonini ado etishga puxta hozirlik ko'rmoqdalar.
Taniqli ulamolar, xususan Toshkent shahridagi "Hazrati Ali" jome masjidi imom-xatibi Salohiddin domla Sharipov haj ibodati boshlanishi oldidan samarqandlik ziyoratchilar bilan haj manosiklari va muborak amal fazilati to'g'risida suhbat qildilar.
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati
