1. Avvalo niyatni to‘g‘rilamoq, ixlos bilan, xolis Alloh uchun ziyorat qilish.

2. Tahoratli bo‘lish.

3. Qisqa muddat bo‘lsa ham dunyo mashg‘ulotini tark etib, oxiratni o‘ylash.

4. Ziyoratgohda viqor bilan sokin yurish.

5. Qabr ahliga bunday salom berish:

“Assalamu ’alaykum, ya ayyuhal-qubur. Yag‘firullohu lana va lukum, antum salafuna va nahnu bil-asari”

“Assalomu alaykum, ey qabr ahli! Alloh bizni va sizlarni mag‘firat etsin. Sizlar bizdan oldin kelgansiz, biz ham sizning ortingizdan kelamiz”.

6. Oyoq tomonidan borib, mayyitga yaqin va yuzma-yuz o‘tirish.

7. Qabrni siypash, ushlash, o‘pish va aylanib tavof qilishdan uzoq bo‘lish.

8. Qabr boshida “Yosin” surasini yoki o‘zi bilgan boshqa sura, oyatlarni o‘qish.

Hazrat Abu Bakr Siddiq roziyallohu anhudan rivoyat qilinadi. Rasululloh sollallohu alayhi vasallam: “Kim ota-onasi yoki ulardan birining qabrini har juma kuni ziyorat qilib, “Yosin” surasini tilovat qilib, uning savobini ularga bag‘ishlasa, suradagi har bir so‘z va harf adadicha Alloh taolo ularning gunohlarini mag‘firat qiladi”, dedilar (Imom Daylamiy rivoyati).

Ma’qal ibn Yasor roziyallohu anhudan rivoyat qilingan hadisda esa Rasululloh sollallohu alayhi vasallam: “O‘liklaringizga “Yosin” surasini tilovat qiling”, deganlar (Imom Abu Dovud rivoyati).

9. Ixlos surasini o‘qish.

Manbalarda “Kim qabristonga kirib, “Qul huvallohu ahad”ni o‘n bir marta o‘qib, savobini o‘liklarga bag‘ishlasa, unga o‘liklar adadicha savob beriladi”, deyilgan.

10. Marhumning yaxshi sifatlarini eslash.

Rasululloh sollallohu alayhi vasallam: “Dunyodan o‘tganlarning yaxshi sifatlarini eslanglar, ularning yomon sifatlarini aytishdan saqlaninglar”, deganlar (Imom Termiziy rivoyati).

11. Qabrni bosmaslik lozim. Qabr usti mayyitning haqqidir. Qabr ustidan yoki qabriston ichidan o‘tish zarur bo‘lsa, tasbeh, tahlil, takbir, duo va istig‘for aytib o‘tish.

12. Ziyoratdan behad sokin, vazmin, o‘ychan holatda qaytish.

Imron ibn Husayn roziyallohu anhudan rivoyat qilinadi: “Rasululloh sollallohu alayhi vasallam janozada hozir bo‘lganlarida qayg‘ulari ortar, nihoyatda kam gapirar, fikr-mulohazaga g‘arq bo‘lar edilar” (Imom Hokim rivoyati).

Davron NURMUHAMMAD