Ayni kunlarda haj ibodatiga tayyorgarlik ko'rayotgan ziyoratchilarimiz Makka shahrining “Aziziya” dahasidagi ko'rkam, 25 qavatli, hashamatli “Abroj al-Hidoya” mehmonxonasida istiqomat qilishmoqda.
Hojilar ibodatlarini chiroyli va mukammal ado etishlari uchun mehmonxona toza va ozoda holga keltirilib, barcha shart-sharoitlar muhayyo qilingan.

O'zbekistonlik ziyoratchilar uchun qulay sharoit yaratish maqsadida, O'zbekiston musulmonlari idorasi hamda Din ishlari bo'yicha qo'mita tomonidan mazkur mehmonxonadan barcha hojilarimizga yaxlit joy hozirlangan.
Mehmonxonaning kirish foyesiga ilingan “O'zbekiston” yozuvi va davlatimiz bayrog'i bu binoga o'zbekistonlik ziyoratchilar joylashishidan dalolat berib turibdi
Ta'kidlash joizki, mehmonxona tomonidan taqdim etilgan xizmatlardan yurtimiz hojilari mamnun bo'lishmoqda. Ushbu mehmonxona qulayliklari haqida gapirganda, avvalo, har bir xona shinam qilib hozirlangan, unda yuvinish xonasi mavjudligi, sovutkich, muzlatkich, stol-stul, jurnal stoli, telefon, televizor va zamonaviy mebellar bilan jihozlanganini ta'kidlash kerak.

Yana shuni aytish kerakki, mehmonxona oshxonasida bir paytda 4000 kishi taomlanishi uchun mo'ljallangan o'rinlar hozirlangan.
Shuningdek, tibbiyot markazi, ishchi guruhi shtabi, majlislar zali hamda erkak va ayollar namozxonasiga alohida joylar ajratilgan. Qolaversa, mehmonxonada ko'p sig'imli bir necha liftlar ham muntazam ishlaydi.
Mehmonxonaning yana bir qulayligi shuki, bitta asosiy yo'l bo'ylab “Harami sharif”ga borish mumkin. Shuningdek, mehmonxona Mino vodiysiga qulay hududda joylashganligi sababli asosiy haj ibodatlari davrida ziyoratchilarni u erga olib chiqish va qaytarib olib kelishda ko'p engilliklar bo'ladi. Mehmonxona atrofidan serqatnov, katta yo'l trassasi bo'lmagani ham hojilar erkin harakat qilish imkonini beradi.
Haj ibodatiga kirishayotgan yurtdoshlarimizni Alloh taolo ibodat va duolarini qabul qilib, safarlarini bexatar aylasin!

O'zbekiston musulmonlari idorasi Matbuot xizmati