O'zbekiston musulmonlari idorasi tasarrufidagi Imom Buxoriy nomidagi Toshkent islom instituti va “Ko'kaldosh” o'rta maxsus islom ta'lim muassasalariga 2022-2023 o'quv yilidan boshlab xorijlik fuqarolarni o'qishga qabul qilish joriy qilindi. Bu haqda O'zbekiston musulmonlari idorasi Ta'lim va ilmiy-tadqiqot bo'limi ma'lum qildi.
Horijlik fuqarolar diniy ta'lim muassasalari Qabul hay'atiga quyidagi hujjatlarni taqdim etadi:
– Qabul hay'ati raisi nomiga ariza;
– ma'lumoti haqidagi hujjatlarning asl nusxasi;
– sog'lig'i to'g'risidagi tibbiy xulosa (belgilangan namunadagi);
– milliy pasport (amaldagi vizasi bilan);
– 6 dona rangli fotosurat (3,5 x 4,5 hajmdagi);
– fuqaroligi bo'lgan mamlakatning muftiysi (mamlakatda muftiy lavozimi mavjud bo'lmagan taqdirda din ishlari bo'yicha tegishli davlat boshqaruvi organi) tomonidan berilgan tavsiyanoma (yoki yo'llanma).
Diniy ta'lim muassasalarida xorijlik fuqarolarning hujjatlari 2022 yil 1 iyuldan 30 iyulgacha (shu kuni ham soat 18:00 gacha) qabul qilinadi.
Horijlik fuqarolar diniy ta'lim muassasalariga O'zbekiston musulmonlari idorasi tomonidan o'tkaziladigan ijodiy suhbat (imtihon) natijalariga ko'ra o'qishga qabul qilinadi. Horijlik fuqarolarni Diniy ta'lim muassasalarida o'qitish to'lov-kontrakt asosida amalga oshiriladi.
Diniy ta'lim muassasalarida xorijlik fuqarolarni o'qitish ta'lim muassasalarining dasturida nazarda tutilgan o'zbek, arab va rus tillarida olib boriladi. Mazkur tillardan birini bilmaydigan xorijlik abituriyent til o'rganish uchun o'qishni ta'lim muassasasida tashkil etilgan tayyorlov kursida o'zbek va arab tillari bo'yicha to'lov-kontrakt asosida bir o'quv yili davomida til o'rgatiladi.
O'zbekiston musulmonlari idorasi Matbuot xizmati
Abu Hanifa aytdilar: "Men dahr’ (abadiy vaqt) nima ekanini bilmayman." Ya’ni, "Men unga "dahr" gapirmayman," degan iboradagi "dahr" so‘zidan qancha muddat qasd qilinganini bilmaganlar. Shuningdek, Imom Abu Hanifa quyidagi masalalarda ham tavaqquf qilib javob bermaganlar. Jumladan:
Birinchi savol: "Faqat najosat bilan oziqlangan hayvonning go‘shti qachon halol bo‘ladi?"
Bu masalada ulamolar ixtilof qilganlar: ba’zilar uch kundan keyin halol bo‘ladi, degan bo‘lsalar, boshqalari yetti kundan keyin, deganlar. Imom Abu Hanifa ushbu masalada tavaqquf qilib javob bermaganlar.
Ikkinchi savol: "Ovchi itni qachon "o‘rgatilgan" deb hisoblash mumkin?"
Imom bu masalaning yechimini amaliy tajriba bilan shug‘ullangan kishiga qoldirganlar. Ushbu masalada ba’zi ulamolar: "Agar it uch marta ovini yemasa, u o‘rgatilgan hisoblanadi", deganlar.
Uchinchi savol: "farzandni xatna qilish yoshi qachon?"
Bu masalada ulamolar ixtilof qilganlar: ba’zilar bolani 10 yoshida sunnat qilish kerak, deganlar; ba’zilar esa 7 yoshida yoki 12 yoshida qilish kerak, deb aytganlar. Imom Abu Hanifa esa ushbu masalada tavaqquf qilib javob bermaganlar.
To‘rtinchi savol: "Xunasa (ya’ni ikki jinsli odam) siydikni ikki joydan chiqarsa, uni erkak yoki ayol ekaniga qanday hukm beriladi?"
Bu masalaning javobini Imom Abu Hanifa ushbu dart ila balolangan kishiga qoldirib: "Siydikning qaysi joydan ko‘proq chiqishiga qaraydi", deb to‘xtalganlar.
Beshinchi savol: eshakning ortgan suvining pokligi masalasi bölib,
Abu Hanifa eshakning ortgan suvining pok yoki nopokligi masalasida qaror chiqarmaganlar.
Oltinchi savol: "Farishtalar payg‘ambarlardan afzalmi yoki yo‘qmi?"
Bu masalada ba’zi ulamolar payg‘ambarlar va maxsus insonlar farishtalardan afzal, deganlar. Imom Abu Hanifa esa ushbu masalada tavaqquf qilib javob bermaganlar.
Yettinchi savol: "Mushriklarning yosh holatda vafot etib ketgan bolalari oxiratda qayerda bo‘ladi?"
Bu masalada ba’zi ulamolar mushriklarning bolalari jannatda bo‘ladi, deganlar. Imom Abu Hanifa ushbu masalada tavaqquf qilib javob bermaganlar.
Sakkizinchi savol: "Masjid devorini shaxsiy mol bilan bezash mumkinmi?"
Ba’zi ulamolar zarurat bo‘lsa, masjidni bezash mumkin, deganlar. Imom Abu Hanifa ushbu masalada tavaqquf qilib javob bermaganlar.
To‘qqizinchi savol: "Jinlarning itoat va ibodatlari tufayli oxiratda insonlar kabi mukofotlanishlari masalasi"
Bu masalada Imom Abu Hanifa jinlar ham insonlar kabi mukofotlanadimi yoki yo‘qmi, degan savolda aniq bir fikr bildirmaganlar.
Xulosa qilib aytganda, bu holatlar Imom Abu Hanifaning chuqur ilmiy ehtiyotkorligi, taqvosi va shar’iy masalalarda asosli dalillarsiz qaror chiqarmaganliklarini ko‘rsatadi. Shuningdek, ular Qur’on va Sunnatni ijtihodlarining asosiy manbasi sifatida ko‘rganlar va qiyosni hech qachon ulardan ustun qo‘ymaganlar.
Azizbek Boqiyev,
Mir Arab oliy madrasasi o‘qituvchisi