Shu kunlarda bir guruh o'zbekistonlik ziyoratchilar haj ibodatini ado etish uchun Saudiya Arabistoniga jo'nab ketmoqdalar. O'zbekistondan Umra amallarini ado etish niyatida muborak zaminga etib borgan fuqarolarimiz Madinai Munavvaradagi 5 yulduzli Pullman Zamzam va Crown Plaza mehmonxonalariga joylashtirildi.
Joriy yil ham ziyoratchilarimizga Madinai munavvarada zamonaviy va barcha qulayliklarga ega mehmonxona o'zbekistonlik ziyoratchilar xizmatida bo'lmoqda. Ushbu mehmonxona Masjidi Nabaviyning shundoqqina yonginasida joylashgan, ziyoratchilarimiz besh mahal namozlarini ushbu tabarruk masjidda ado etish saodatiga etishmoqdalar. Ayni kunda, ziyoratchilar ibodatlarini chiroyli va mukammal ado etishlari uchun mehmonxonada barcha shart-sharoitlar muhayyo qilingan.
Mehmonxonaning keng zali kishi diqqatini o'ziga tortadi. U erda yangi, qulay o'rindiqlar joylashtirilgan bo'lib, ko'chadan charchab kelgan odam uchun salqinlanib olishga mo'ljallangan.
Ziyoratchi o'z xonasiga ko'tarilmoqchi bo'lsa, bir nechta liftlar ishlamoqda. Har bir xonada ozoda ko'rpa-yu choyshablar to'shab qo'yilgan. Honadagi televizor orqali Ka'bai muazzama yoki Masjidun Nabaviyni to'g'ridan-to'g'ri tomosha qilib o'tirishlari mumkin. Shuningdek, har bir xonada kiyim javoni, yozuv stoli, sovutgich va muzlatgich ham hozirlangan.
Ishchi guruhi tomonidan mehmonxonada tibbiyot bo'limi va O'zbekiston Ishchi guruhi shtabi tashkil etilgan bo'lib, tibbiyot bo'limi ham kerakli o'rindiq va yotoq mebellari bilan ta'minlangan. Shuningdek, ziyoratchilarimizga laziz va milliy taomlar tortiq qilinmoqda.
Alloh taolo yurtdoshlarimizning hajlarini mabrur aylasin!

O'zbekiston musulmonlari idorasi Matbuot xizmati