Qorilar e'tiboru e'tirofda
Kuni kecha O'zbekiston musulmonlari idorasida idora va “Qur'on va tajvidni o'rgatish” bo'limi tashabbusi bilan Ramazon oyidagi xatmi Qur'on tadbirlarida munosib ishtirok etgan xofizi qorilani taqdirlash marosimi bo'lib o'tdi.
Unda Qoraqalpog'iston Respublikasi, viloyatlar va Toshkent shahri jome masjidlaridagi xatmi Qur'onlarda munosib ishtirok etib, go'zal tilovati, tajvidi va odob-axloqi bilan namozxonlarning mehri va hurmatini qozongan, “Qur'on va tajvidni o'rgatish” bo'limi tomonidan ma'lum mezonlar asosida saralab olingan 26 nafar qorilar taqdirlandi.
Tadbirda O'zbekiston musulmonlari idorasi raisi, birinchi o'rinbosari Homidjon domla Eshmatbekov hamda “Qur'on va tajvidni o'rgatish” bo'limi mudiri Shayx Alijon qori ishtirok etib, yurtimizda yil sayin qorilarimiz safi ham xatmi Qur'onlar o'qilayotgan masjidlarimiz soni ham ko'payib borayotganini e'tirof etishdi.
Shu bilan birga bu yilgi Ramazon xatmi Qur'onlari har yilgidan ko'ra, shukuhli o'tganini, buni Qur'onga muhabbatli xalqimiz ham alohida e'tirof etayotganini ta'kidladilar. Qolaversa, O'zbekiston tarixida ilk bor tashkil etilgan qorilarni taqdirlash marosimi bundan keyin bardavom bo'lishini qayd etdilar.
Tadbir davomida qorilarga Vaqf fondi tomonidan taqdim etilgan pul mukofotlari va qimmatbaho sovg'alar topshirildi.
O'zbekiston musulmonlari idorasi Matbuot xizmati
Hamdardlik bildiramiz
O‘zbekiston musulmonlari idorasi jamoasi "Haj" va "Umra" tadbirlarini tashkil etish markazi xodimi Qudratulloh Umrzoqovning buvici Halimaxon onaning vafoti munosabati bilan u kishining oila a’zolari va yaqinlariga chuqur ta’ziya izhor etadi.
Alloh taolo marhuma onaxonni O‘z mag‘firatiga olsin, iymonlari va solih amallarini o‘zlariga hamroh aylasin. Oxiratlarini obod etib, joylarini Firdavs jannatlaridan qilsin!
Haq taolo marhuma onaxonning ahli oilasi, farzandu arjumandlari va yaqinlariga chiroyli sabr berib, bu musibatlarini yaxshiliklar ila to‘ldirsin.
O‘zbekiston musulmonlari idorasi jamoasi, Ulamolar kengashi a’zolari, imom-domlalari va o‘qituvchi-mudarrislari nomidan marhuma onaxonning yaqinlariga xususan, Qudratulloh Umrzoqovga hamdardlik bildiradi.
Janoza namozi bugun asr namozidan so‘ng Andijon shahar, Bo‘ston mahallasidagi (Adham somsa kafesi oldidan kiriladi) marhumaning xonadonida o‘qiladi.
Innaa lillaahi va innaa ilayhi roji’uun.
«Musibat yetganda “Albatta, biz Allohnikimiz va albatta, biz Unga qaytuvchimiz”, degan sabrlilarga xushxabar bering».
O‘zbekiston musulmonlari idorasi
